![163 млрд теңге медициналық көмекті қаржыландыруға бағытталды](/media/2020/10/14/200114150456a3603523d.png)
Осы жылдың 8 айында МӘМС-ға 351,2 млрд теңге жарналар мен аударымдар түсті. Бұл ретте мемлекет медициналық сақтандыру жүйесіне негізгі төлеуші болып қала береді. Ол 15 жеңілдік санаты үшін жарна төлейді. Мемлекеттің жарналары 197,2 млрд теңгені, жұмыс берушілердің аударымдары – 100,9 млрд теңгені құрады. Оның ішінде 50,8 млрд теңгені қызметкерлер, жеке кәсіпкерлер, жеке практикамен айналысатын адамдар, өз-өзіне төлеушілер жарналары,
2,3 млрд теңгені бірыңғай жинақтаушы зейнетақы жарналары құрады.
МӘМС үшін жарналар мен аударымдар Ұлттық банктегі арнайы шотқа түсетінін, содан кейін қаражат МӘМС пакеті бойынша көрсетілген медициналық қызметтерді төлеуге Қордың жеткізуші медициналық ұйымдарына жіберілетінін атап өтеміз.
«Қазіргі уақытта елімізде емханаларға тіркелу науқаны жүріп жатыр. Бекіту науқанының қорытындысы бойынша медициналық ұйымдар бөлінісінде халықтың бөлінуін ескере отырып, 2021 жылға қаржыландыру жоспарланатын болады. Қор барлық қазақстандықтарды ескере отырып, дерекқордың абсолютті дұрыстығына мүдделі. Өйткені әрбір тіркелген тұрғын үшін ай сайын медициналық ұйымдарға жан басына қаржыландыру төленеді», деп еске салды қор өкілдері.
Қаңтар-тамыз аралығында шығындардың басым бөлігі стационарлық медициналық көмек төлемі – 62 млрд теңгеден астам және ауылдағы стационарлар қызметі үшін 14,6 млрд теңгені құрады. 8 айда жоспарлы түрде еліміздің стационарларында 660 мыңнан астам адам ем қабылдады.
Консультациялық-диагностикалық көмек көрсеткені үшін медициналық ұйымдарға 54 млрд теңге төленді. Айта кету керек, КТ және МРТ қызметтері азаматтар үшін бұрынғысынша өзекті болып қалуда. 8 айда пациенттерге КТ және МРТ 400 мыңнан астам қызмет көрсетілді.
Қор халыққа жоғары технологиялық қызмет көрсеткені үшін 14 млрд теңгеден астам қаржы төледі. Мұндай қызметтерді 4,5 мыңнан астам адам алды. 13 млрд теңге стационарды алмастыратын көмекті төлеуге бағытталды.
Биылғы 8 айда Әлеуметтік медициналық сақтандыру қоры халыққа 2,8 млн-нан астам стоматологиялық қызмет көрсеткені үшін 5,1 млрд теңге төледі. Сонымен қатар 67 мыңға жуық қазақстандық жедел жағдайдан (инфаркт, инсульт және т.б.) және операциялық араласудан кейінгі медициналық оңалту алды.
Еске сала кетейік, екінші тоқсанда карантин аясында жоспарлы түрде медициналық көмек көрсетуге шектеу қойылды. 1 тамыздан бастап еліміздің клиникаларында жоспарлы медициналық көмек қайта басталды.Сондықтан тамыз-қыркүйек айларында МӘМС пакетінде халықтың медициналық қызметтерді тұтынуының өсуі байқалады.