«MED-EL жұлдызы» атты музыка фестиваліне қостанайлық жас дарынмен қатар, Ресей, Украина сияқты көптеген елдің өнерпаз өрендері қатысқан. Шыңғыс байқауға Қостанай қаласының орталығында түсірілген «Rise like a phoenix» әнінің бейнебаянын жіберіпті.
– Ұлым отитпен ауырып, үш жасында мүлдем есту қабілетін жоғалтты. Төрт жасқа толған соң, имплант орнаттық. Тілі қалыптасқан соң, баламыздың ән салуды ұнататынын аңғардық. Сөйтіп, вокал үйірмесіне бердік. Кейін биге жазылып, екі үйірмені қатар алып жүрді. Шыңғыс есту қабілеті зақымданған балаларға арналған арнайы балабақшада тәрбиеленді. Бірақ қазір көпшілікпен бірге жалпы білім беретін мектепке барып жүр, – деді жас әншінің анасы Ләззат Ағыбаева.
Қазылар алқасы ән фестиваліне қатысқан 85 үміткердің 16-сын ғана финалға жіберген. 10 қазанда өткен ақтық кезеңнің қорытындысы бойынша үздіктер қатарынан дараланып шыққан Шыңғыс жеңімпаз атанды. Анасының айтуынша, бұл дарынды өнерпаздың алғашқы жеңісі емес. Ол бұған дейін Польша астанасында да ән шырқап, жеңіс тұғырынан көрініпті.
Қостанай облысы
