Осы жылғы тағы бір жаңалық – жылу маусымының жылдағыдан 5 күн ерте басталуы. Қазан туа күн салқындап, облыс басшылығының тапсырмасымен жылу осы айдың алғашқы онкүндігінде-ақ беріле бастады.
Қазір облыстағы 1 185 әлеуметтік нысанға және орталықтандырылған жылу жүйесіне қосылған 713 көпқабатты тұрғын үйге жылу тұрақты берілуде.
Өңірдегі әлеуметтік сала нысандарына алдағы қыстан шығу үшін 39,5 мың тонна қатты және 26 мың тонна сұйық отын қажет. Тұрғындарға қажетті көмір мөлшері – 163,6 мың тонна. Қазір осы көмірдің 113,0 мың тоннадан астамы жеткізілді.
Жылу беру маусымы кезеңінде Қызылорда қаласының өзіне ғана тасымалдаушы жеке кәсіпкерлер тарапынан барлығы 889 вагон немесе 61 385 тонна көмір жеткізіледі. Қазір қаладағы «БЕК», «Қарымсақов» жеке кәсіпкерлігі мен «Олжас-2005», «ТЭК Қазақстан» жауапкершілігі шектеулі серіктестіктерінде көмір қоры жеткілікті. Қала билігі тарапынан оның бағасы да бақылауда тұр.
Әр қыста көмірдің қат болып, бағасының да күрт өсіп кететіні жиі байқалып жүр. Осындай келеңсіздік биыл қайталанбас үшін облыс басшылығы көмір өндіретін кәсіпорындармен тікелей келісімшарт жасап, тұрғындарға тиімді бағамен сатуға баса назар аударып отыр. Осы күні облыс аумағында 30 көмір жинақтау қоймасы жұмыс істеп тұр. Олардың бесеуі – Қызылорда қаласында, қалғандары – аудандарда. Жалпы, жылу маусымының тұрақты өтуі – облыстық штабтың бақылауында.
Өңірге газ келгелі көмірге сұраныстың бұрынғыдан төмендегені белгілі. «ҚазТрансГаз Аймақ» АҚ өндірістік филиалы директорының бірінші орынбасары Ермек Қалдығұловтың хабарлауынша, биыл газ таратқыш желілеріндегі жоспарланған техникалық қызмет және басқа да жұмыстар толықтай жүргізілді. Жалпы ұзындығы 2 305 шақырымдық газ құбыры, 54 блоктік және 193 шкафтық газ реттегіш бекеттері бар мекеме маусымға толық дайын.
«ҚазТрансГаз Аймақ» АҚ өндірістік филиалы қазір облыс бойынша 111 256 тұтынушыға, осыған қосымша газға қосылған 2 403 коммуналдық-тұрмыстық кәсіпорынға газ беріп отыр.
– Тұтынушылардың барлығы бірдей жылу маусымына әзір деп айту қиын. Көптеген дүкен, дәмхана, мейрамхана бүгінге дейін газды сатып алуға келісімшарт жасамаған, сондай-ақ көпшілігінің техникалық қызмет көрсетуге шарттары жоқ. Осыған байланысты тұтынушыларға ескерту жұмыстарын жүргізудеміз. Бұл нәтиже бермесе, кәсіпорындарға газ беру тоқтатылады, – дейді «ҚазТрансГаз Аймақ» АҚ өндірістік филиалы директорының бірінші орынбасары Е.Қалдығұлов.
Сонымен қатар жеке тұлғалардың газға қарызы 1 млрд теңгеге жуықтап отыр. Осы себептен де «ҚазТрансГаз Аймақ» АҚ Қызылорда өндірістік филиалы берешегі бар тұтынушыларды газдан ажыратуға мәжбүр. Олар тұтынушы түбіртек парағына сәйкес әр айдың 25-іне дейін пайдаланылған газға төлем жасау қажеттігін айтып отыр. Ажыратылған абонент қарызын толық өтегеннің өзінде газды ажыратып, қайта қосу қызметінің ақысын төлеуі тиіс. Мұндай шығынға ұшырамаудың басты жолы – коммуналдық төлемді уақтылы төлеу.
Қызылорда
