Медицина • 29 Қазан, 2020

Сирек кездесетін кеселдер де көңіл бөлуді қажет етеді

16 рет көрсетілді

Орта есеппен 100 мың нәрестенің біреуінде кездесетін мукополисахаридоз дейтін дерт бар. Биыл «Help Today» қоғамдық қоры мен «Жаңа өмір» мукополисахаридозы және сирек кездесетін аурулары бар пациенттер қоры» қоғамдық қоры «Такеда Қазақстан» компаниясымен бірлесіп, II типті мукополисахаридозы (II МПС) бар пациент­терге арналған білім беру мектептерінің циклін ұйымдастырды.

Мукополисахаридоздар (МПС) – белгілі бір фермент­тердің қалыптасуына жауап беретін гендердің мутациялануынан пайда болатын, сирек кездесетін тұқым қуалайтын аурулар тобы. МПС созылмалы прогрессивті ағынмен және әртүрлі жүйелік көрі­ністермен сипатталады. Ауру орталық жүйке жүйесіне, жүрек-тамыр, тыныс алу жүйелеріне, сүйек-буын аппаратына, ішкі ағзаларға (бауыр, көкбауыр) әсер етуі ықтимал, сондай-ақ пациенттер есту мен көру қабілетін жоғалтуы мүмкін.

МПС-тың жалпы алғанда және оның жеке типтерінің таралуы әлемде әртүрлі. Бүгінгі таңда Қазақстанда мукополисахаридоздардың түрлі типтері бар 76 пациент тіркелген. Сонымен II МПС бар пациенттерді қолдаудың жаңа форматы денсаулық сақтау саласындағы сарапшылар мен Хантер синдромы бар пациенттер арасындағы тиімді диалог алаңы болып отыр. Бүгінгі таңда ұйымдастырушылар екі білім беру мектебін өт­кізді. Бұл уақыт талабына сәйкес онлайн форматта өтті және си­рек генетикалық ауруы бар пациенттердің өзекті мәселелеріне арналды. Іс-шараларға МПС-тың басқа да типтері бар пациенттер қосылды.

«Біз үнемі мукополисахаридозы бар пациент­терді қолдаудың жаңа жолдарын іздейміз. Бұл, әсіресе коронавирус пандемиясы кезеңінде өзекті болды», дейді «Жаңа өмір» мукополисахаридозы және сирек кездесетін аурулары бар пациенттер қоры» қоғамдық қорының директоры Самат Рамазанов.

Мектептің бірінші отырысында Қазақстандағы МПС бойынша республикалық үйлестіруші, Педиатрия және балалар хирургиясы ғылыми орта­лығының балалар гастроэнтерологы Майра Шәріпова МПС ауруының ерекшеліктеріне тоқталып, елдегі және әлемдегі COVID-19 жағдайы, сондай-ақ пациенттер үшін коронави­рустан кейінгі ықтимал ас­қынулар және пандемия ке­зіндегі қауіпсіздік шаралары туралы баяндады.

«Мукополисахаридоз –­ бұл­ өте ауыр ауру. Егер оны емдемесе, ерте балалық шақ­та мүгедектік пен өлімге әке­леді. Әзірге МПС-дың тек бес типін емдеуге арналған препараттар жасалды: I, II, IV, VI және VII. Емдеу ферментті алмастыру терапиясы түрінде ұсынылады – аптасына бір рет пациенттерге жетіспейтін ферменттер тағайындалады. Бұл препараттар өте қымбат, бірақ біздің мемлекет I, II, IV және VI типтері бар балаларды тегін қамтамасыз етеді. Бірақ ферментті алмастыру терапиясынан басқа біздің ерекше емделушілеріміз арнайы жағдайларға мұқтаж. Сондықтан мукополисахаридоздармен ауыратын пациенттерге арналған білім беру мектептерінің циклі – олардың өмір сүру сапасын арттыруға жәрдемдесудің та­маша мүмкіндігі. Бұл мек­­­тепке тек Хантер синдро­мы­мен ғана емес, муко­поли­саха­ридоздың барлық түрлері бар пациенттердің ата-аналары қатысатынын атап өт­кім ке­леді. Себебі мәсе­ле бәрі­не ор­тақ», дейді Майра Шәрі­пова.

Екінші мектеп ЖРВИ маусымына арналды. Оның барысында «University Medical Center» корпоративтік қо­ры Ана мен бала ұлттық ғылыми орталығы соматика бөлімінің меңгерушісі және орфандық үйлестірушісі Айгүл Ибраева сарапшы болды. Ұйымдастырушылар МПС-пен ауыратын пациенттерге арналған білім беру мектептері жалғасатындығын айтады.

 

АЛМАТЫ

 

Соңғы жаңалықтар

Оралда 198 отбасы баспаналы болды

Аймақтар • Бүгін, 18:28

Доллар қымбаттап жатыр

Экономика • Бүгін, 15:54

COVID-19: Қартаюды жақындатуы мүмкін

Коронавирус • Бүгін, 14:43

Күзенді қырған COVID-19

Әлем • Бүгін, 13:14

Қыстың бірінші күні үсіп қалған

Аймақтар • Бүгін, 12:18

Алтайлық аналар баспаналы болды

Аймақтар • Бүгін, 11:20

Ұқсас жаңалықтар