Қазан айында қаладағы індет жұқтырудың үдеуі карантин шараларын жеңілдетуге мүмкіндік бермейді. Өкінішке қарай тұрғындар сақтық шараларын ескере бермейді, ал ауырған жағдайда байланысқан адамдарын ашық айтпай, фактілерді жасырады.
«Соңғы уақытта коронавирус инфекциясымен ауыратын науқастардың тұрғылықты жері мен жұмыс орны бойынша, сондай-ақ жақын байланыста болғандар туралы фактілерді жасыру және жалған ақпарат беру жиілеп кетті. Бұл эпидемияға қарсы іс-шараларды уақтылы жүргізуге кедергі келтіреді», деді Ж.Пірәлиева.
Сондай-ақ бизнес субъектілері шектеу шараларын, санитарлық нормалар мен карантин режімін елемей отыр. Бұған 27 және 28 қазанда мониторингтік топтар жүргізген күндізгі және түнгі рейдтердің нәтижелері дәлел бола алады. Тексерілген 290 нысанның 49-ында талаптардың орындалмағаны анықталды.
«Мейрамханаларда көптеген адам шақырып, отбасылық іс-шаралар өткізу әлі де бар. Мысалы, 24 қазанда Тұран даңғылы, №5 мекенжайындағы GRANDHALLASTANA мейрамханасында 70-тен аса адам болды. Онда «Қыз ұзату» тойы өтіп, 50 адам қатысты, ал туған күн залында 20 адам болды», деді Нұр-Сұлтан қалалық ПД жергілікті полиция қызметі басқармасының бастығы Госман Жакин.
Сондай-ақ мобильді топ Манас көшесіндегі «Пошашлычим» дәмханасы мен «Жаным-сол» караоке-барында жұмыс күндері және демалыс күндері белгіленген жұмыс кестесін сақтамай, өз қызметін жүзеге асырған тәртіпсіздікті анықтады. Тыйым салынған уақытта Тұран даңғылы, 19 үйдегі Fast425 түнгі клубы да жұмыс істеді.
«Құрметті елорда тұрғындары мен қонақтары, айналаңыздағы адамдардың денсаулығы мен өміріне қамқорлықпен қарауыңызды сұраймыз. Ол үшін тек қарапайым ережелерді сақтау керек: міндетті түрде медициналық маска тағу, әлеуметтік қашықтықты сақтау, адамдар көп жиналатын жерлерге бармау керек», деді Бас санитарлық дәрігер.
