Қазақстан Республикасы Парламентінің Мәжілісі – заң шығару билігін жүзеге асыратын және тұрақты негізде әрекет ететін республиканың жоғары өкілді органы Палаталарының бірі. Мәжіліс депутаттарының өкілеттік мерзімі – бес жыл.
Парламент Мәжілісі жүз жеті депутаттан тұрады.
Мәжілістің тоқсан сегіз депутаты жалпыға бірдей, тең және төте сайлау құқығы негізінде жасырын дауыс беру арқылы партиялық тізімдер бойынша сайланады.
Мәжілістің тоғыз депутатын Қазақстан халқы Ассамблеясы сайлайды.
Қазақстан Республикасының жиырма бес жасқа толған және Қазақстан аумағында соңғы он жылда тұрақты тұратын азаматы Парламент Мәжілісінің депутаты бола алады.
Сот іс-әрекетке қабілетсіз деп таныған, сондай-ақ сот үкімі бойынша бас бостандығынан айыру орындарында отырған азаматтардың сайлануға құқығы жоқ.
Партиялық тізімдер бойынша сайланатын Парламент Мәжілісінің депутаттығына кандидаттар ұсыну құқығы белгіленген тәртіппен тіркелген саяси партияларға, ал Қазақстан халқы Ассамблеясы сайлайтын Мәжіліс депутаттығына кандидаттарға қатысты - Ассамблея Кеңесіне тиесілі.
Мәжіліс депутаттығына сайлау үшін адамдарды партиялық тізімге енгізу саяси партияның жоғары органы мүшелері жалпы санының көпшілік даусымен жүргізіледі.
Партиялық тізімде әйелдер мен жиырма тоғыз жасқа толмаған адамдардың саны оған енгізілген адамдардың жалпы санының кемінде отыз пайызын құрауға тиіс.
Мәслихаттар – тиісті әкімшілік-аумақтық бірлік халқының еркін білдіретін және оны іске асыру үшін қажетті шараларды айқындайтын, сондай-ақ олардың жүзеге асырылуын бақылайтын жергілікті өкілді органдар. Мәслихаттар депутаттарының өкілеттік мерзімі – бес жыл.
Мәслихаттардың депутаттары жалпыға бірдей, тең, төте сайлау құқығы негізінде жасырын дауыс беру арқылы сайланады.
Қазақстан Республикасының жиырма жасқа толған азаматы мәслихат депутаты болып сайлана алады.
Сот іс-әрекетке қабілетсіз деп таныған, сондай-ақ сот үкімі бойынша бас бостандығынан айыру орындарында отырған азаматтардың сайлануға құқығы жоқ.
Партиялық тізімдер бойынша сайланатын мәслихаттар депутаттығына кандидаттар ұсыну құқығы белгіленген тәртіппен тіркелген саяси партияларға тиесілі.
Мәслихат депутаты болып сайлану үшін адамдарды партиялық тізімге енгізу саяси партияның тиісті филиалының немесе өкілдігінің жоғары басшы органы мүшелерінің жалпы санының көпшілік даусымен жүргізіледі.
Партиялық тізімде әйелдер мен жиырма тоғыз жасқа толмаған адамдардың саны оған енгізілген адамдардың жалпы санының кемінде отыз пайызын құрауға тиіс.
