Ведомство басшысының айтуынша, еліміздегі қылмыс саны 37%-ға азайып, ауыр қылмыстардың ішінде денсаулыққа зиян келтіру қылмыстары – 12%-ға, зорлық – 39%-ға, қарақшылық – 52%-ға, тонау – 50%-ға, бұзақылық фактілері 45%-ға төмендепті.
– Жасөспірімдер арасындағы қылмыс азайды. Көшеде жасалатын қылмыс – 51%-ға, мас күйде жасалатын қылмыс – 16%-ға азайып отыр. Қылмысты ашу көрсеткіші жақсарды. Ауыр қылмыстардың 64%-ы, аса ауыр қылмыстардың 94%-ы ашылды. Сонымен қатар карантин кезінде үйде отырып, алкогольдік ішімдіктер ішу фактілері көбейген. Соның салдарынан тұрмыстық қылмыстардың саны өсті. Ішімдік әсерінен адам өлтіру фактілері – 12%-ға, жасөспірімдерге қатысты зорлық фактілері 19%-ға артып отыр. Көп жағдайда жәбірленушінің жақын танысы немесе туысы зорлағаны анықталып отыр. Олар – әкесі, өгей әкесі, көршісі немесе таныстары. Мұндай әрбір факті – отбасы үшін үлкен трагедия. Жағдайды дұрыстау үшін профилактикалық шаралар күшейтіліп, есепте тұрған азаматтармен жұмыс жүргізілді, – деді Е.Тұрғымбаев.
Министрдің айтуынша, отбасын қорғау үшін учаскелік инспекторлар 61 000 қорғау нұсқамасын шығарыпты. Сондай-ақ еліміздегі қылмыстық жағдай 29 қазанда Мемлекет басшысы Қасым-Жомарт Тоқаевтың қатысуымен өткен Ішкі істер министрлігінің алқа отырысында баяндалды. Аталған отырыста Президент қоғамдық қауіпсіздікті сақтауда полиция қызметкерлерінің жұмысы маңызды екенін айтып, ведомствоның алдына нақты тапсырмалар қойған болатын.
– Мемлекет басшысы ең алдымен қоғамдағы тәртіптің сақталуын тапсырды. Президент ұлтаралық келісім мен қоғамдағы тұрақтылық – ең басты құндылық екенін алға тартты. Адамдар өз қауіпсіздіктері үшін алаңдамауы керек. Бүгінде Ішкі істер министрлігі әлеуметтік дау-дамайлар мен қоғамдық тыныштықты бұзудың алдын алу бойынша барлық қажетті шараларды қабылдап жатыр. Қызметтің сервистік моделі енгізілуде. Тұрғындардың қауіпсіздігін қамтамасыз ету мәселесі де жолға қойылды. Патрульдік полицияның жұмысы көшелерде, бақтарда, аулаларда, адамдар көп жиналатын орындарда қауіпсіздіктің сақталуын қамтамасыз етуге бағытталып отыр. Әкімдіктермен бірлесіп криминогенді аудандарда Жапония, Оңтүстік Корея және Сингапур елдерінің тәжірибесі бойынша арнайы стационарлық бекеттер қойылып жатыр. Ол жерде полиция қызметкерлері тәулік бойы қылмыстардың алдын алып, азаматтарды қабылдай алатындай жағдай жасалған. Бүгінде аймақтарда осындай 44 бекет орнатылған. Алдағы екі жылда дәл осындай 176 бекет орнату көзделіп отыр, – деді Е.Тұрғымбаев.
Ведомство басшысының айтуынша, учаскелік инспекторлардың мәртебесін заңнамалық тұрғыда көтеру жұмыстары жүргізілуде. Президент өз сөзінде «қылмыстың алдын алатын негізгі тұлға – учаскелік инспектор» деп атап өткен болатын. Ол жергілікті халықтың проблемаларын шешіп, қылмыстардың жолын кесіп, азаматтардың қауіпсіз болуын қамтамасыз етуі керек. Сондықтан учаскелік инспекторлардың құзыретін арттыру жұмыстары әлі де жалғасатын болады.
– Оларға заңнамалық тұрғыда өздігімен тыйым салуға, тәртіп бұзған азаматтарға шектеу қоюға құзырет беру жоспарлануда. Мәселен, учаскелік инспектор жанжал шығарған отбасы мүшесін үйден шығарып жібере алады. Сондай-ақ учаскелік инспектор шешім қабылдай алатындай баптардың санын арттыру көзделуде, – деді ведомство басшысы.
