Бұл туралы Шығыс Қазақстан облысы бойынша білім беру саласында сапаны қамтамасыз ету департаментінің басшысы Зейнеп Мақсұтова хабарлаған. Аталған департамент жыл басынан бері жалпы білім беретін мектептерге профилактикалық бақылау жүргізіп, білім беру ұйымдарын жоспардан тыс тексерген. Департамент мамандары білім беру қызметіне лицензия беру және білім туралы құжаттарға апостиль қою бойынша мемлекеттік қызметтер көрсетеді.
Қазіргі уақытта Шығыс Қазақстан облысының 19 колледжі кейбір мамандықтар бойынша лицензияға қосымшаны өз еріктерімен қайтарып берген. Оның 10-ы – мемлекеттік, қалған 9-ы – жекеменшік оқу орындары. Атап айтсақ, фермер шаруашылығы, есептеу техникасы, бағдарламалық қамтамасыз ету, ішкі санитарлық құрылғыларды, желдеткіштерді және инженерлік жүйелерді монтаждау, металлургиядағы машиналар мен жабдықтар, механикалық өңдеу, токарьлық пен металл өңдеу, сәндік қолданбалы өнер, іс қағаздарын жүргізу және мұрағаттау сынды мамандықтардың лицензиялары қайтарылған. Бұл мамандықтардың кейбіреуі цифрланған қоғамда аса қажет болмағанымен, токарьлардың тапшы екені сөзсіз.
– Бас тарту себептері негізінен мемлекеттік баж салығының дұрыс төленбеуімен және таңдалған елдердің Гаага Конвенциясына кірмеуімен байланысты, – дейді білім беру саласында сапаны қамтамасыз ету департаментінің басшысы.
Білім туралы құжаттарға апостиль қою қызметі бойынша биыл қаңтар-қазан айларында 561 өтініш келіп түскен екен. Департамент басшысының айтуынша, барлығы 497 құжатқа апостиль қойылды. Оның ішінде 394-і – жоғары білім туралы, 94-і – кәсіптік-техникалық білім туралы және 94-і – жалпы орта білім туралы құжат. Ал 64 құжат белгілі себептерге байланысты қабылданбаған.
– Биыл біздің департаментке лицензиялау мәселелері бойынша 114 өтініш келіп түсті. Оның ішінде 62 өтініш қанағаттандырылды, 46 өтініш қайтарылды, ал 6 өтініш қаралуда, – деді Зейнеп Махсутова.
Шығыс Қазақстан облысы бойынша білім беру саласында сапаны қамтамасыз ету департаментінің биылғы басты міндеттерінің бірі колледждер мен жоғары оқу орындарының студенттері үшін қашықтан білім беру технологияларына қолжетімділіктің болуына мониторинг жүргізу еді. Елдегі індетке байланысты 14 наурыздан бастап департамент оқу орындарының қашықтан оқытуын үнемі қадағалауларында ұстап отырды.
– Мониторинг 71 колледж және 7 жоғары оқу орнын қамтыды. Атқарылған жұмыстардың қорытындысы бойынша студенттердің басым бөлігі қашықтан білім беру техналогиясына қол жеткізе алатыны анықталды. Бірақ кейбір колледждерде интернет жылдамдығының төмендігі анықталды. Бірақ осы мәселелердің барлығы шешілді. Колледждерге жұмысты жақсарту бойынша ұсыныстар уақтылы жіберіліп, қажетті көмек көрсетіледі, – деп қосты З.Махсутова.
Алайда «Шығыс Қазақстан техникалық-экономикалық колледжі» және «Семей қаласының Еуразиялық көпсалалы колледжі» ЖШС-де қашықтан оқыту платформасы жоқ болғандықтан, оқыту «WhatsApp» желісі арқылы жүргізілген екен.
Мониторинг мектептерді күрделі жөндеу, оқулықтарды жеткізу, мектеп дәретханаларын пайдалануға беру, бейнебақылаумен жабдықтау жұмыстарына да жүргізілді. Анықталғандай, 304 орта білім беру ұйымдарында дәретханалар орнатылған, 40 мектепте күрделі жөндеу жүргізілді, барлық оқушы жаңа мазмұндағы оқулықтармен және әдістемелік кешендермен толық қамтамасыз етілген.
Сонымен қатар департаменттің қызметкерлері ҰБТ және облыстағы педагогтердің ұлттық біліктілік тестілеуін өткізу кезінде бақылаушы ретінде де тартылған. Тестілеу кезінде студенттер мен оқытушылар тарапынан ереже бұзушылық фактілері тіркелді. Ұялы телефондарды пайдаланған 21 түлек тестілеуге жіберілмеді. Тыйым салынған заттарды алып кіруге байланысты 47 тест нәтижесінің күші жойылды. Педагогтер тарапынан ұялы телефондарды пайдаланудың 26, шпаргалкаларды пайдаланудың 31 жағдайы және тест сұрақтарын алып шығудың 4 фактісі тіркелді. Нәтижесінде, тест тапсырғандардың қорытындылары жоққа шығарылған. Бұдан басқа 24 педагог тәртіптік жауапкершілікке тартылыпты.
Шығыс Қазақстан облысы
