Соңғы жағдай бойынша Жамбыл облысында коронавирус індетін жұқтырудың 5 жағдайы тіркелді. Бүгінде науқастарда ауру симптомсыз түрде өтіп жатыр екен. Жалпы, қауіпті індет Тараз қаласының Шу, Меркі, Т.Рысқұлов аудандарының тұрғындарынан анықталған. Індет жұқтырғандар – әртүрлі жастағы азаматтар. Бірақ олардың барлығы да ауруханаға жатар алдында тексерістен өткен. Жалпы алғанда, бүгінде Жамбыл облысы бойынша коронавирус жұқтырудың 4 225 жағдайы тіркелген болса, ауруханалардан 4 114 науқас емделіп шыққан. Дегенмен дәл қазіргі уақыт аса сақтықты қажет ететін болып тұр.
Жуырда ғана өңірде коронавирус індетімен күрес бойынша облыстық жедел штабтың кезекті отырысы өткен болатын. Аталған жиында Жамбыл облысы бойынша санитарлық-эпидемиологиялық қадағалау департаменті басшысының міндетін атқарушы Нейля Муликова өткен айда өңірде коронавирус індетін жұқтырудың 60 жағдайы тіркелгенін, ол алдыңғы аймен салыстырғанда аурушаңдық деңгейінің 1,4 есеге өскенін хабарлаған еді. Оның айтуынша, жағдайлардың көбі Тараз қаласы, Шу, Байзақ және Қордай аудандарында анықталған. Алайда 31 инфекция ошақтарында қорытынды дезинфекциялық шаралар жүргізіліп, байланыста болған 230 адам үй карантиніне оқшауланған.
Қазіргідей күрделі кезеңде қауіпсіздік шараларын сақтауды әуелі әркім өзінен бастағаны дұрыс. Дегенмен қоғамдағы жағдайдың да реттелгені маңызды. Осы орайда биылғы 10 қазан мен 6 қараша аралығында мониторингтік топтар 9 125 нысанды қамтып, 1 328 рейдтік тексерістер жүргізген. Нәтижесінде, карантиндік режімнің 530 бұзылу дерегі анықталып, 17 млн 852 мың 840 теңгеге 163 хаттама толтырылған. Бұл ретте Нейля Муликова Байзақ, Шу, Талас, Сарысу аудандары мен Тараз қаласының мобильді топтарының жұмысын жандандыру қажет екенін айтты. Яғни олардың жұмысы бүгінде әлсіз. Сондықтан да қазіргідей күрделі кезеңде мұны жандандыру маңызды.
Ал облыстық Денсаулық сақтау басқармасының басшысы Әсет Қалиевтің айтуынша, бүгінде облыста 345 мыңнан аса адам вакциналаудан өткен. Халықты қамту көрсеткіші 30 пайызды құраған. Бір айта кетерлігі, жұқтыру қаупі жоғары топтағы адамдарға вакцина ақысыз егілуде. Бұл тізімге медицина қызметкерлері, жүкті әйелдер, 14 жасқа дейінгі балалар және зейнеткерлер кіреді екен.
Алайда қазіргі уақытта жағдайды түзеліп кетті деуге болмайды. Облыстың бас санитар дәрігерінің қаулысымен өңірде карантиндік шаралардың жеңілдетілуі қабылданғанымен, барлық шектеу шарасы алынып тасталған жоқ. Өкінішке қарай, талап толығымен орындалмай отыр. Бір ғана мысал, аудандық мобильдік топ Қордай ауданының орталығы Қордай ауылында үздіксіз рейд жүргізуде. Нәтижесінде, Қордай ауылындағы «Көмбеш» тамақтану орны мен «Қанат» азық-түлік дүкенінде санитарлық талаптардың сақталмағандығы анықталған. Сонымен қатар мобильді топ Қордай ауылындағы Ә.Жұмабеков көшесі тұрғынының беташар рәсімін өткізіп жатқан кезінің үстінен түскен. Той иелеріне әкімшілік құқықбұзушылық туралы хаттама толтырылып, құжаттары тиісті мекемеге жолданған. Осы сияқты келеңсіздіктер келешекте өзге де аудан, ауылдарда қайталанбауы үшін, әркім карантин талаптарын өзінен бастағаны дұрыс.
Жамбыл облысы
