«Жаңа толқын» жағдайында 5 500-ге жуық кадр резервте тұр
Аталған бағытта атқарылып жатқан жұмыстар туралы кезекті онлайн-брифингте Жоғары медициналық колледждің директоры Светлана Сұлтанғазиева айтып берді. «Дәрі-дәрмекпен дер кезінде қамтамасыз ету, клиникалардың материалдық-техникалық жабдықталуы, инфекциялық төсектік орындарды ұлғайту сынды әлеуметтік-экономикалық мәселелерден басқа денсаулық сақтау ұйымдарын медицина кадрларымен қамтамасыз етуге ерекше көңіл бөлінді», деді ол.
Медициналық кадрлармен қамтамасыз етуді талдау барысында 2020 жылғы 1 тамыздағы жағдай бойынша COVID-19 ауруын емдеуге 27 Денсаулық сақтау ұйымы жұмылдырылып, 6 200-ге жуық төсектік орын орналастырылғаны анықталды. Сол кезде инфекциялық стационарларда
4 035 қызметкер еңбек етті.
Эпидемиялық жағдай тұрақтала келе, көпсалалы клиникалар қалыпты режімге көшкені белгілі. Коронавирус инфекциясы бар жұқпалы клиникаларда 100-ден аса науқас бар, 400-ге жуық дәрігер және мейіргер, кіші медициналық персоналдар штаттық режімде жұмысын жалғастырып отыр.
Қазір Алматы қаласында қоғамдық денсаулық басқармасына қарасты 74 ұйым, 20 республикалық ұйым және 93 жекеменшік нысанындағы ұйым жұмыс істейді. Бұл ұйымдарда 38 мыңнан аса қызметкер бар.
«Жаңа толқын» жағдайында 5 500-ге жуық медициналық кадр резервте тұр. Медициналық жоғары оқу орындарының оқытушылары, резиденттері мен дәрігер интерндерінен резерв қалыптастырылды, олардың саны 450-ге жуық.
Дәрігерлердің біліктілігін көтеруге қаражат бөлінді
Алматыда COVID-19 ауруын диагностикалау мен емдеу тақырыптары дәрігер даярлаудың басым бағыттарына айналып отыр.
«Биыл КВИ диагностикасы және емдеу, жаңа инфекциялық клиникаларда жұмыс істеу үшін медицина қызметкерлерін даярлауға баса көңіл бөлінді. Осы өзекті тақырыпқа шетелдік (Израиль, Германия, Ресей, Испания, Англия, Корея және т.б.) және отандық мамандарды тарта отырып, біліктілікті арттырудың 40-тан аса циклі өткізілді. Коронавирус инфекциясы тақырыбы бойынша тәжірибелік денсаулық сақтаудың 3 мыңнан аса қызметкері білімін жетілдірді. Басқа циклдарда 4,5 мыңға жуық маман оқытылды», дейді Жоғары медициналық колледждің директоры.
С.Сұлтанғазиваның айтуынша, жылдан жылға дәрігерлер мен орта медицина қызметкерлерін дипломнан кейінгі даярлауға жергілікті бюджеттен қаржыландыру өсіп келеді. Өткен жылдармен салыстырғанда 2020 жылы Алматы қаласының медицина қызметкерлерінің біліктілігін арттыруға жергілікті бюджеттен 60%-дан аса қаржы бөлінген.
«2020-2021 оқу жылдарында біздің колледжде оқу үшін 325 грант бөлінді, ал алдыңғы жылдары гранттар саны 225-тен аспаған. Мұның бәрі Алматы қаласы әкімдігінің жергілікті атқарушы органының тәжірибелік денсаулық сақтау проблемаларына жіті назар аударатынын білдіреді», дейді спикер.
Келер жылы 4 100-ден аса колледж студенті оқуын аяқтайды
Амандық болса, 2020-2021 жылдары медициналық колледждердің 7,5 мыңнан аса түлегі мейіргерлер «әскерін» толықтырады. Бүгінгі таңда Алматы қаласында бакалаврларды, интерндерді, резиденттер мен докторанттарды дайындаумен айналысатын ірі жоғары оқу орындарынан бөлек, орташа медициналық қызметкерлерді дайындаумен 10-нан аса медициналық колледж айналысады. Бұл оқу орындарында 14 мыңнан аса студент білім алуда (бұл білім алушылардың жалпы контингентінің саны), оның 10%-ға жуығы гранттық негізде оқиды. Оқыту «Емдеу ісі», «Мейірбике ісі», «Зертханалық диагностика, гигиена және эпидемиология», «Стоматология», «Фармация» және басқа да мамандықтар бойынша жүргізіледі.
«2020 жылы медициналық колледждерде оқуын аяқтаған 3 628 түлек диплом алды, атап айтқанда, біздің колледжден 364 маман бітірді. Бүгінгі таңда осы жылғы түлектер арасында жұмысқа орналасу пайызы жоғары және 93%-ға дейін жетеді, бұл біздің студенттеріміздің қажеттілігін және білім берудің тиісті сапасын көрсетеді», деп атап өтті С.Сұлтанғазиева.
2021 жылы колледждердің 4 100-ден астам студенті оқуын аяқтайды, олар Алматы қаласы мен өңірлердің тәжірибелік денсаулық сақтау саласындағы қатарларын толықтырады.
Өткен жылдан бастап медициналық ұйымдардың сұраныстарына сәйкес, кадрлар даярлауға бағытталған дуальды білім беру енгізілді, яғни бұл – оқу орнында оқытуды тәжірибелік қызметпен үйлестіру, білім алушы үшін жеке бағдарлама жасау. Сабақтардың теориялық бөлігі 30%-дан аспайды, студенттер көп уақыт тәжірибемен айналысады, әрі қарай сол ұйымда жұмыс істейді.
Жалпы, Алматыда медицина кадрларын даярлау жүйесі жолға қойылып, осы бағыттағы жұмыстар жалғасын тауып жатыр.
АЛМАТЫ
