Жыл басында жарияланған байқаудың шартына сәйкес еліміздің түкпір-түкпірінен жиырмаға жуық сурет келіп түскен. Картиналар жазушының «Құдайсыздар», «Жынды жел», «Ағайындар», «Жұлдызды белбеу», «Ит жылы», «Зауал» сынды әңгімелерінің желісі бойынша жазылған. Портретін бейнелеген суретшілер де болды. Ал байқаудың жеңімпаздары жазушы шығармасын бейнелеу арқылы тақырыпты аша түсуіне қарай анықталды. Әлбетте, орындау техникасы, шеберлігі де басшылыққа алынды. Байқауға ұсынылған жұмыстарды жазушы, суретші Әлібек Асқаров, «Қазақ елі» монументінің авторы Сембіғали Смағұл, белгілі шарж шебері Еркін Нұразхан, өзіндік ерекше қолтаңбалары бар суретшілер Әділғали Баяндин, Жеңіс Кәкенұлы бағалады.
– Қаламгердің шығармашылығына қатысты сурет көрмесі өте бермейтін. Соңғы рет қырғыз ағайындар Шыңғыс Айтматовтың 90 жылдығында суретшілер көрмесін өткізген еді. Енді міне, Дидахмет Әшімханұлының әңгімелерінің желісі бойынша бірнеше полотно жазылыпты. Бұл жақсы үрдіс, деп атап өтті Қазақстан Суретшілер Одағының мүшесі Еркін Нұразхан.
Ал бас жүлде – 500 мың теңгені еншілеген жармалық суретші Мәди Қайырхан жазушының шығармаларына композициялық картина және «Құдайсыздар» әңгімесінің желісіне майлы бояумен иллюстрация жасаған.
«Құдайсыздар» әңгімесінде тақырыбы айтып тұрғандай, коммунистік партия тұсындағы басшылардың құдайсыз іс-әрекеттері суреттелген.
Жас суретші жазушының әңгімесіндегі «Арқалап кеткен жоқ, жетектеп кетті ғой, аға. Мұндағы бәріміздің қарап отырғанымыз – бір қызыл сиырдың төрт емшегі еді, соны алып кетті ғой апамыз...» деген жолдарын терезенің арғы жағында көрсетіп, философиялық ойды жеткізген. Бергі планға жұпыны үйдің терезесінен телміріп қарап тұрған қара ұлды бейнелеген. Отағасы терең уайымға батқандай. Әйелі құндақтағы баласына мейірімін төгіп отыр. Қабырғада Сталиннің портреті ілінген. Қызыл жағалылар есікті шалқасынан ашып, төбелерінен төніп тұр. Міне, бас жүлде иегері Мәди Қайырхан әңгімедегі негізгі ойды топтастырып, бір картинаға сыйғызған.
Сонымен қатар бірінші орын алған суретшіге – 300 мың, екінші орынға – 200 мың, үшінші орынға 100 мың теңге үлестірілді. Одан бөлек ынталандыру сыйлықтары да ұсынылды. Жазушының ұлы Дәулет Әшімхановтың ұйымдастыруымен өткен байқауға демеушілік еткен кәсіпкер Ғани Шаймарданұлы еді.
Естеріңізге сала кетсек, жазушы, журналист Дидахмет Әшімханұлы еңбек жолын Шығыс Қазақстан облысының «Коммунизм туы», «Лениншіл жас» газеттерінде тілші болып бастап, өмірін жазушылыққа, журналистикаға арнады. Ғұмырының соңына дейін ұлттың жоғын жоқтап, қалың оқырманының ыстық ықыласына бөленіп өтті.
Шығыс Қазақстан облысы
