Бұл туралы Өскемен қаласының әкімі Жақсылық Омар хабарлады.
"Бүгін кешке Өскемен қаласының құрметті азаматы Вера Николаевна Сухорукованың мезгілсіз өмірден өткенін өкінішпен хабарлаймын. Вера Николаевнаның туыстары мен жақындарына қайғырып көңіл айтамын", - деп жазды Жақсылық Омар.
Вера Сухорукова 1951 жылы 10 тамызда Шығыс Қазақстан облысы Шемонаиха ауданы Выдриха ауылында дүниеге келген. Өскемен жол-құрылыс институтын бітіргеннен кейін мемлекеттік органдарда жұмыс істеген.
1999 жылы Өскемен қаласының әкімі болып тағайындалды. Одан кейін 2003-2004 жылдары Шығыс Қазақстан облысы әкімінің орынбасары болды.
Қазақстан Республикасы Парламенті мәжілісінің ІІІ шақырылымының депутаты болып, экономикалық реформа және өңірлік даму комитетін басқарды.
Өскемен қаласының әлеуметтік-экономикалық дамуына қосқан зор үлесі үшін қаланың құрметті азаматы атағы берілді.
"Құрмет" және "Барыс" ордендерімен марапатталған.
