Сапар барысында министр облыс басшылығымен, ішкі саясат, жастар саясаты, дін істері басқармаларының басшыларымен, сондай-ақ жергілікті бұқаралық ақпарат құралдары, үкіметтік емес ұйымдар жетекшілерімен, әлеуметтік кәсіпкерлікпен айналысатын қоғамдық ұйымдармен және волонтерлермен кездесті.
Атырау облысы жұртшылығы өкілдерімен кездесу барысында министр Мемлекет басшысы қол қойған жаңа заңдар мемлекеттік органдар қызметінің де, квазимемлекеттік ұйымдар жұмысының да ашықтығын арттырудағы маңызды құжат екендігін атап өтті. «Заңнамалық өзгерістер «Халық үніне құлақ асатын мемлекет» тұжырымдамасын жүзеге асыруға ықпал етеді», деді А.Балаева.
Еске сала кетейік, 2020 жылғы 30 желтоқсанда Мемлекет басшысы «Қазақстан Республикасының кейбір заңнамалық актілеріне ақпарат мәселелері бойынша өзгерістер мен толықтырулар енгізу туралы» Заңға қол қойды. Министрдің айтуынша, түзетулерге мемлекеттік ақпараттық тапсырыс берудің жаңа ережелері енгізілген. Олар республикалық және аймақтық деңгейлерде жалпы тақырыптық бағыттарды айқындауды қарастырады. Сонымен қатар осы жылдың 3 қаңтарында Мемлекет басшысы «Қазақстан Республикасының кейбір заңнамалық актілеріне қоғамдық кеңестердің қызметі мәселелері бойынша өзгерістер мен толықтырулар енгізу туралы» Заңға қол қойды. Осы заңға сәйкес Ақпарат және қоғамдық даму министрлігі қоғамдық кеңестердің қызметін үйлестіріп, әдістемелік қолдау көрсетеді.
Қазақстанда қоғамдық кеңестер 2015 жылдан бастап жұмыс істейді, ал жаңа түзетулер қоғамдық кеңестер құру мен олардың жұмыс істеу тетіктерін жетілдіруге жан-жақты мүмкіндік береді. Сөйтіп, қазір қоғамдық кеңестерге НҚА жобалары мен үндеулерді олардың қоғамдағы өзектілікке сәйкес қарау туралы шешім қабылдауға өкілеттік берілді.
Облыс активімен кездесуде А.Балаева азаматтық қоғам институттарын мемлекеттің шешім қабылдау процестеріне тартудың келесі мақсатты қадамы «Қоғамдық бақылау туралы» Заң жобасы болатынын атап өтті. «Құрылымды қалыптастырушы Заң қоғамдық бақылаудың жүйеленуіне және тиімділігін арттыруға мүмкіндік береді», деді ол.
Оған қоса, АБалаева аймақ жұртшылығы өкілдеріне «петиция» ұғымын енгізу мен оны қарау тәртібін реттейтін нормативтік-құқықтық база әзірленіп жатқанын айтты. Сонымен бірге жұмыс сапары барысында министр Атырау облысы Дін істері басқармасының «Ақпараттық талдау орталығы» КММ, Атырау облысы Ішкі саясат басқармасының «Азаматтық орталығы» КММ және облыстағы әлеуметтік кәсіпкерлікті дамыту мәселелерімен айналысатын «Мөлдір көз» қоғамдық бірлестігінің жұмысымен танысты.
Атырау облысы
