Қоғам • 06 Қаңтар, 2021

Нұрғали Нүсіпжанұлы: Ұлт құндылығы - басты байлығымыз

64 рет көрсетілді

Қазақстанның халық әртісі, мемлекеттік сыйлықтың лауреаты Нұрғали Нүсіпжанұлы Президент Қасым-Жомарт Тоқаевтың «Тәуелсіздік бәрінен қымбат» атты мақаласына қатысты пікір білдірді, деп хабарлайды Egemen.kz.

Мемлекет басшысы Қасым-Жомарт Кемелұлы Тоқаевтың: «Тәуелсіздік бәрінен қымбат» деп аталған мақаласын оқып шыққанда ой он тарапқа бөлінді. Рас, дәуірлер алмасады, дәстүр жалғасады. Уақыттың сынынан сүрінбей өткен ұранды елдің ұрпағының басына нелер келіп, нелер кетпеді. Кешегі кеңес заманында мәдениетіміз бен әдебиетіміздің аяғы тұсауда, мойны бұғауда болды. Советтік идеология кереғар үгіт-насихат тіліміздің, тарихымыздың өрелі өрісін, адымын аштырмай тіпті тынысын тарылтып келгенін аға ұрпақ жақсы біледі. Дәстүр: салт-сана, әдет-ғұрып сынды игі дүниелермен бірге өзі де мың өліп, мың тірілген қазақ баласы үшін әлбетте ел егемендігі бәрінен құнды, құдіретті. Осы тұрғыдан алғанда Қасымжомарт Кемелұлының: Тіл, тарих, әдебиет пен мәдениет салт дәстүрімізді жаңғырту туралы астын сыза айтқан ой-толғамдары жанымызды қозғап, жүрегімізді тербеді.
Елімізден құт-береке қашпасын,-деп
Жеріміздің шетін жау баспасын,-деп
Найзаға үкі таққан еліміз атам заманнан ана тілін төбесіне көтерген. Қылышынан қан тамған Қызыл Империяның құрсауындағы қазақ жерінде жетімнің күйін кешкен қайран тіліміздің хәл-қадірі қай заманда да әңгімемізге аз өзек болып келе жатқан жоқ. Ана тіліміздің ертеңі үшін бүгін қам-қарекет жасаудың да мән-маңызы мақалада айрықша айтылған. Біздің қару, қалқанымыз өз тіліміз, төл өнеріміз екенін ел-жұрттың жадында тағы бір жаңғыртудан ұтпасақ ұтылмасымыз айдан анық.

Баршаны бауырына басқан алаштың ағайынды алалап, ала қойды бөле қырыққан жері жоқ. Ешкімді кеудесінен кері итермеген сол қазақ-елінің тірегі, халқының жүрегіне айналған перзенттерге кенде болған емес. Ендеше өзін Қазақстандықпын, - деп есептейтін әр азамат мемлекеттік тілді меңгеруге міндетті.

«Тәуелсіздік жылдарында талантымен таңдай қақтырған жас өрендердің тұтас легі өсіп-жетілді. Бүкіл әлемді аузына қаратқан ғажайып дарын иелері де бар. Олар - Қазақстанның мәдени келбеті, елімізді халықаралық аренада танытып, Тәуелсіздік құндылықтарын жер жүзіне паш ететін рухани елшілеріміз, біздің айрықша күшіміз. Осындай азаматтарға қамқор болу - мемлекеттің міндеті». Бұл «Егемен Қазақстан» газетіне шыққан президентіміз Қасым-Жомарт Тоқаевтың мақаласынан үзінді.

Бұдан шығар қорытынды: Ана тіліне деген құрмет, салт-дәстүрге деген ізет ұлттық құндылығымыз болып есептелу керек. Қазақи тәлім-тәрбие бесіктен басталып ол күллі қазақстандықтарға мемлекеттік деңгейде насихатталса құба-құп.

Мемлекет басшысының игі бастамасы жалпыхалықтық сипат алса,-деген ақ жарма тілек бар бізде. Барымызды бағалайық. Тәуелсіздікті аялайық.

Отанды сүю ұйысқан ұлтыңды сүюден басталатынын ұмытпайық. Ендеше жасымыз да, жасамысымыз да бірауыз болып біріксек алда алар қанша асу, бағындырар қанша белесіміз бар. Қонысы құтты, іргесі мықты қазақтың сенімі бүтін, бірлігі берік екенін жер жаһанға бәріміз бірге дәлелдейік...

Нұрғали НҮСІПЖАНҰЛЫ,
Қазақстанның халық әртісі, мемлекеттік сыйлықтың лауреаты, Жамбыл атындағы мемлекеттік филармонияның әншісі, Қазақ көркем өнерінің академигі

Соңғы жаңалықтар

Ұқсас жаңалықтар