Ведомство басшысы Мәртөк ауданында болып, мәдениет пен спорт мекемелерін аралады. 2019 жылы аудан орталығында спорт мектебінің ашылуы жасөспірімдердің спортпен шұғылдануына жол ашты. Бүгінде шаңғы, биатлон, көп сайыстан жақсы өнер көрсеткен осы ауданның балғын спортшылары республикалық құрама команда қатарына алынса, 10 жас биатлоншы Ақтөбе қаласындағы облыстық олимпиадалық резерв мектебінде оқиды. Мәртөк мектебінің мықты болуы жаттықтырушыларының арқасы. Бұл жақта кеңестік заманнан жалғасқан жаттықтырушылық мектеп әкеден балаға, ұстаздан шәкіртке сабақтасып келеді. Бір кемшілігі заманауи спорт мектебінің болмауы, спорт жабдықтарының ескілігі болатын. 160 орынға арналған дене шынықтыру-сауықтыру кешені салынғалы аудан жастары бірнеше спорт түрімен шұғылдана бастады. Бұл жерде 50-ден астам бала суға жүзумен де айналысады. Бассейн есігі сенбі, жексенбі күндері мүмкіндігі шектеулі және көп балалы отбасылардың балалары үшін ашық әрі жаттығу тегін. Спорт кешенінде жұмыс істейтін жаттықтырушылар саны артқан. Олардың еңбекақысы жөнінде сұраған министр «Жаттықтырушылар мен спорт нұсқаушылары базалық айлық есептің 100 пайыздық деңгейінде еңбекақы алуы керек», деп тапсырма берді. Өйткені, ақылы негізде жұмыс істейтін спорт секцияларынан түскен төлемнің қандай да бір бөлігі жаттықтырушыларға берілуі қажет.
Қысқы спорт түрлері жақсы қарқынмен дамып жатқан Мәртөк ауданының ауылдық округтерінде де бұқаралық спорт түрлерін дамыту жоспарға енгізілген. Биыл жаздан бастап Саржансай, Қаратоғай, Родниковка елді мекендерінде спорт залдары, Сарыжар, Жайсаң елді мекендерінде ангар түріндегі спорт кешендері салынатын болды.
Мәдениет және спорт министрі Ақтоты Райымқұлова мен өңір басшысы Оңдасын Оразалин аудандық кітапхана қорын аралап, аудандық мәдениет үйінде қолөнерші Ерқосай Әбілов пен ағаш ұстасы Еділбай Ұзақбаевтың көрмесімен танысты. 1976 жылы салынған Мәртөк аудандық мәдениет үйі өткен жылы «Жұмыспен қамтудың жол картасы» бағдарламасы аясында күрделі жөндеуден өтті. Бюджеттен бөлінген 145,8 млн теңге қаржыға жөндеу жұмыстарын «KND Construction» ЖШС-і жүргізді. Құрылысқа Мәртөк ауданының 21 жұмыссыз тұрғыны тартылған. Қазір 460 орынға кеңейтілген Мәдениет үйінде 18 үйірме жұмыс істейді. Бұл жерде министр мен өңір басшысы ауыл клубтарының жетекшілерімен кездесіп, елді мекендердегі мәдениет ошақтарының қазіргі жағдайы туралы әңгімелесті.
Осыдан кейін А.Райымқұлова Ақтөбе қаласындағы Қысқы спорт түрлеріне арналған облыстық мамандандырылған балалар мен жасөспірімдер мектебіне барып, жаттықтырушылар мен тәрбиеленушілермен кездесіп, Кірпішті елді мекеніндегі ұзындығы 11,5 шақырым болатын роликті шаңғы жолының ашылуына қатысты. Сапар соңында министр Ақтөбедегі облыстық филармония ғимаратында мәдениет қызметкерлерімен кездесті.
Ақтөбе облысы
