Сайлау • 12 Қаңтар, 2021

Халықаралық стандарттарға сәйкес

335 рет
көрсетілді
2 мин
оқу үшін

Қазақстандағы Парламент Мәжілісі және мәслихат депутаттарының сайлауы барысында ешқандай заңбұзушылық тіркелген жоқ. Бұл туралы баспасөз мәслихатында түркітілдес мемлекеттер ынтымақтастығы кеңесі Хатшысының орынбасары, сайлау байқаушылары делегациясының басшысы Омер Кожаман баяндады.

Халықаралық стандарттарға сәйкес

«Қазақстандағы Мәжіліс және мәслихат депутаттарының сайлауы ұлттық заңнамаға және халықаралық нормаларға сәйкес өткізілді. Сайлау нәтижесі Қазақстанның одан әрі қарқынды дамуына үлес қосады деген сенімдеміз. Біз осы сайлау­да байқаушы қызметін атқарып, өз миссиямызды орындадық. Сон­дай-ақ бұл құрамда Өзбекстан, Әзербайжан, Қырғыз елінің өкіл­дері де бар. Бақылаушылық міндет Қазақ­станның заңнамасына және халық­аралық стандарттарға сай жүр­гізілді және аккредиттеу кам­паниясы барысында саяси пар­тиялардың өкілдерімен кездестік», деді О.Кожаман. Қазақстанда  сай­лау бойынша жұмыстар 253 аумақ­тық және 10 063 учаскелік сайлау комиссиясында өткізіліп, 300-дей үміт­кер мен 12 млн сайлаушы тір­келген.

Халықаралық байқаушының айтуынша, заңнамаға сәйкес, сай­лау­дың жалпылама объективті өтуіне бақылау жүргізіліпті. Сонымен бірге COVID-19 пандемиясы жағ­дайы ескеріле отырып, сайлау учас­ке­лерінде санитарлық талаптар қатаң сақталған. «Миссия басқа да ха­лықаралық байқаушылармен ынты­мақтаса отырып, сайлауды қада­ғалады. Халықтың барлық жас­тағы тұрғындары сайлауға қатыс­ты, бірқатар сайлау учаске­лерінде ерекше қажеттілігі бар жандарға арналған пандустар бол­ған жоқ. Біздің ойы­мызша, ол сайлау­шылардың қаты­суына, дауыс беруіне кедергі болады. Ал жалпы Қазақ­станның ұйым­дастырған сайлауы басқа елдер үшін үлкен тәжіри­бе болады деп ойлаймын. Түр­кітілдес мемлекеттер ын­тымақ­тас­тығы кеңесі Парламент Мәжілісі мен мәслихат депутаттары сайлауы ашық транспарентті түр­де және ұлттық заңнама мен халық­аралық стандарттарға сәйкес жүр­гізілді деп есептейді», деп қоры­тындылады О.Кожаман.