Әдетте, желтоқсан айында киіктер күйлейді де, текелер күш-қуаттан арылып, әлсіреп қалады. Мәселен, биыл Қарағанды және Ақмола облыстарының аумағында 14 бас текенің өліп қалғаны ресми түрде тіркелді. Мамандардың айтуынша, бұл қалыпты жағдай жануарлар осылайша табиғи сұрыпталады.
Қарағанды облыстық орман және жануарлар дүниесін қорғау шаруашылығының директоры Мақсат Мұқанов арнайы мамандар киіктер мекен еткен жерлерді анықтап, жануарларға жемшөп жеткізетінін мәлім етті.
– Қазір киіктердің күйек кезеңі. Көбіне аталық бөкендер әлсіреп, қырылып қалды. Әлеуметтік желілерде олардың жолға шығып кеткен бейнекөріністері, аязда қатып қалған суреттері салынды. Иә, мұндай фактілер бар. Қазір біз жергілікті әкімдіктермен тізе қосып, киіктерді жемшөппен қамтамасыз етуді бастадық, – дейді ол.
Мамандар қазіргі таңда Қарағанды облысының аумағында 20 мыңға жуық киіктің қыстап жатқанын айтады.
Қарағанды облысы
