Мұндай жағдай бастапқыда көптің таңданысын тудырғаны рас. Себебі өңірде қар барысы бұрын-соңды көп болмаған. Жуырда Меркі ауданының аумағынан тағы бір қар барысының арнайы камераға түсіп қалғаны туралы ақпарат тарады. Бұл ақпарат әлеуметтік желілерге де жүктеліп, көптің талқысына түсті.
Қар барысы туралы аталған ақпараттың мән-жайын білу үшін «Меркі орман шаруашылығы» мекемесі директорының орынбасары Азат Еренсізге хабарласқанымызда, ол Меркі ауданы аумағындағы тау шатқалдарынан тағы бір қар барысының арнайы камераға түсіп қалғанын айтты. Қар барысы соңғы рет өткен жылғы 25 желтоқсан күні көрінген. Тау тағысы осымен бірнеше рет камераға түскен. Жалпы, Меркі ауданы аумағындағы ерекше қорғалатын табиғи аймақта бүгінде 8 қар барысы бар. Оның ішінде 2 барыс аталық, 2 барыс аналық болса, қалған 4-еуі аландары екен.
Қазіргі кезде қар барыстары Әулиеата аймағында тұрақтанған. Ал болжам бойынша бұлар көрші Қырғыз мемлекетінің тауларынан ауып келген болуы да мүмкін. Дегенмен, табиғаттың баға жетпес байлығы – қар барыстарын сақтап қалу аса маңызды. Азат Еренсіздің айтуынша, қар барысына аңшылар тарапынан кез келген уақытта қауіп төнуі мүмкін. Алайда ол ерекше қорғалатын табиғи аймақтарға үнемі рейд жүргізіліп отыратынын жеткізді. Аталған аңды сақтап қалу мақсатында тиісті шаралар да қабылданған. Тіпті Меркі тауларындағы қар барыстары туралы БҰҰ «Даму» бағдарламасына да хабарланған. «Қызыл кітапқа» енетін сирек жануар алғаш рет Жамбыл облысының аумағында 2018 жылы тіркелген. Қазіргі кезде орман шаруашылығының аумағында қар барыстары жиі пайда бола бастағандықтан, оларға 11 фототұзақ орнатылған.
Жамбыл облысы