Бұл туралы адвокат Еркін Кахаров өзінің Facebook парақшасында айтты.
Оның айтуынша, қарт әйелді өз қыздары күйеулерімен ұрған. Бұл жағдайдың басты себебі – әкесінен мұраға қалған үйді бөлісе алмауы. Адвокат мұның бәрі қарт ана марқұм күйеуімен бірге салып, өмір бойы тұрып келген үйін 2018 жылы өзінің кіші қызына сыйға тартқан кезден басталғанын айтты.
Алайда, үйді кіші қызының атына аударғаннан он күн өткен соң, қызы қайтыс болады. Жылжымайтын мүліктің мұрагері осы кіші қыздың күйеуі және оның екі баласы болды. Үйдің 1/8 бөлігі заңға сәйкес, бірінші кезектегі мұрагер ретінде әженің өзіне тиесілі. Дегенмен, кенже қызының күйеуі әйелі қайтыс болғаннан 40 күн өткен соң, қайын енесінен үйден кетуін сұраған. Бірақ қарт ана баратын жері жоқ және оның үйі осында екенін айтқан. Осы жағдайдан соң сот процестері басталды.
Әженің айтуынша, сот талқылауына ол 1,8 миллион теңге жұмсап, нәтижесінде сотта жеңіліс тапқан.
Кейін әженің қалған екі қызы мұрадан өз үлестерін алмақ болып, кіші қызының күйеуімен қосылып туған аналарын ұрып соққан. Нәтижесінде, ананың сол қолы екі жерден сынып, денесінде көптеген көгеру мен жаралар қалған.
Еркін Кахаров атап өткендей, орын алған жағдайдан кейін ол өз өзіне қол жұмсамақ болған. Сонымен қатар жергілікті тұрғындар анасын ұрып соққан қатыгез балаларды жазалау туралы өтінішпен полицияға жүгінген, бірақ олардан әзірге жауап болмай отыр.
Айтолқын МЫРЗАКЕРИМ
