Таяуда шебер электр күбі жасап шығарды. Бұл күбінің ерекшелігі сол, ол қымызды бір минутта 60 мәрте, тіпті 70 рет те піседі екен. Осындай жолмен демделген қымыздың дәмі қолмен пісілгенінен бір де бір кем емес дегенді айтады білетіндер.
– Электр күбі жасау идеясы қымыздың емдік қасиетіне байланысты туындады. Қымызды әдетте қолмен піседі ғой. Шәкіртім екеуміз сол жұмысты қалай жеңілдетсек деп іздендік. Мен оған күбінің дизайны туралы айттым. Содан кейін электр қуатының көмегімен қымыз пісудің ырғағы мен реттілігін бұзбай күбіні жасап шығардық, – дейді Қайролла Мәлік.
Қазіргі таңда ол өзі жасаған электр күбісіне патент алу үшін қажетті құжаттарды жинастырып жүр.
Қайролла Мәліктің қолынан келмейтіні жоқ. Ол күбіден басқа түрлі музыкалық аспаптарды жасайды. Шебердің қолынан шыққан қобыз, домбыралар өнер адамдары тарапынан жоғары сұранысқа ие. Өзінің айтуы бойынша, ең алғашқы домбырасын 7-сыныпта оқып жүргенінде шапқан екен. Сонымен қатар ол келістіріп ат әбзелдерін және тастан қашап диірмен де жасайды.
Қайролла Мәлік алдағы уақытта баяғыдағы хандардың көшпелі арбасын қалпына келтіріп, киіз үйдің этнографиялық негізін сақтап қалатын жылжымалы мұражай ұйымдастырғысы келеді.
Бүгінде ол Қарағандыдағы гуманитарлық колледжде ұстаздық етіп, өзінің білгенін жас буынға үйретіп жүр.
Қарағанды облысы,
Бұқар жырау ауданы
