Ынтымақтастық жалғаса береді

Пікір • 25 Қаңтар, 2021

Ынтымақтастық жалғаса береді

8 рет көрсетілді

Қазақстан биылдан бастап Еуразиялық экономикалық одақ органдарында төрағалық етуді қабыл алғаны белгілі. Осыған орай Мемлекет басшысы Қасым-Жомарт Тоқаев ЕАЭО-ға мүше-мемлекеттердің басшыларына Үндеу жолдап, алдағы қадамдарды айқындады.

Egemen Qazaqstan

Осы одақ туралы айтқан кезде ең алдымен оған мүше-мемлекеттердің арасындағы сыйластық жайында айту керек шығар. Сыйластық қайтсе де болуы шарт. Өкінішке қарай, Ресей Федерациясы депутаттарының бұған дейін білдірген орынсыз пікірлері бұл мемлекеттің билігі ұстанған позицияға қарама-қайшы келіп қалғаны аңғарылады.

Әрине, қай мемлекеттің болсын ұстанымын сол елдің Президенті мен Сыртқы істер министрі ғана айқындай алады. Алайда аңдаусыз айтылған артық пікір осы одақтың мән-мағынасына дақ түсіріп алған секілді. Сондықтан мемлекеттер арасында сыйластық болса қарым-қатынас та, сауда-саттық та дамиды. Бұл ретте, Президентіміздің Ресей Федерациясының Қазақстандағы Төтенше және өкілетті елшісі Алексей Бородавкинді ІІ дәрежелі «Достық» орденімен марапаттауы – Ресей мен Қазақстанның арасындағы достастықты нығайтуға бағытталған қадамы деп қабылдауға болатын сияқты.

Өз басым, осы одаққа Өзбекстанның кіргенін қалар едім. Өкінішке қарай, Өзбекстан ондай қадамға әлі бара қоймайтын сияқты. Бұл мемлекеттің одақ құрамына қосылғаны Қазақстан үшін де қолайлы болар еді. Себебі бір экономикалық аймақта болсақ, бауырлас екі ел арасында мүдделестік арта түсетіні ақиқат. Алыс-беріс, сауда-саттық дамиды. 30 млн халқы бар мемлекетпен санаспай қоя алмаймыз. Бұл қадам екі мемлекетке тиімді болатынына сенімдімін.

Ашығын айтайық, меніңше, қазір Еуразиялық экономикалық одақтан Қазақстаннан гөрі, Ресей көп пайда көріп отыр. Оны мойындауымыз керек. Алайда осы одаққа Өзбекстан, Түрікменстан, Әзербайжан тіпті Түркия сынды бауырлас түркі мемлекеттері қосылатын болса, біздің де асығымыз алшысынан түсуі ықтимал. Сондықтан алдағы бес жылда ауқымды жұмыстар атқарылып, маңызды мәселелер талқыланады деп сенемін.

Самат НҰРТАЗА,

Еуразиялық интеграция институтының сарапшысы

Күннің маңызды және өзекті жаңалықтарын «Егемен Қазақстан» телеграм каналынан оқыңыз