Денсаулық сақтау басқармасының басшысы Сәбит Пазыловтың айтуынша 5 қаңтардан бастап мектеп оқушысының ыстығы көтеріліп, өзін жайсыз сезіне бастаған екен. Оныншы қаңтар күні №5 емханаға қаралып, облыстық жұқпалы аурулар ауруханасына жатқызылады. Осы емдеу мекемесінде алынған ПЦР тест теріс нәтиже берген соң, 19 қаңтар күні балалар ауруханасына ауыстырылыпты. Бұл жерде алынған сынама да бала бойында коронавирус инфекциясының жоқтығын көрсеткен. Республикадағы басқа да тәжірибелі мамандармен ақылдаса отырып, қойылған басқа диагноз да анықталмапты. Неше күнгі емнен кейін де оңалмаған 10 жастағы бала 24 қаңтар күні көз жұмды. Оған дәрігерлер «өкпе, жүрек жеткіліксіздігі» деген диагноз қойып отыр.
Облыстық білім басқармасының басшысы Ақзира Қасымова қайтыс болған мектеп оқушысының Қызылорда қаласындағы №8 П.Осипенко атындағы мектептің 4 сыныбында оқығанын айтып өтті.
– Бала І тоқсаннан бастап онлайн форматта, қашықтан оқып келген. Оқу үлгеріміне қатысты проблема туындаған емес. Қашықтан оқытуға байланысты электронды техникамен қамтылған. Бала ауырғаннан бастап, сынып жетекшісі отбасымен үнемі хабарласып, жағдайын біліп отырған, – дейді басқарма басшысы.
Брифингте басқарма басшысы мектептердегі оқу процесін ұйымдастыру бас мемлекеттік санитариялық дәрігердің қаулысы негізінде жүргізілетінін жеткізді. Білім беру ұйымдарында санитариялық талаптар толық сақталған. Дәстүрлі түрде оқитын балалар 5 сатылық дезинфекциялық тексеруден өтеді. Мектепке ата-аналардың кіруіне тиым салынған. Оқушылардың да шоғырланбауы ұдайы қадағаланып отырады. Облыс бойынша қазір 89 258 оқушы қашықтан, 80 636 шәкірт дәстүрлі форматта білім алуда.
Жалпы оқу жылы басталғалы бері 22 оқушы ковидке шалдығыпты. Оның 6-ы дәстүрлі түрде кезекші сыныптарда білім алатындар қатарынан анықталса, 16-ы қашықтан оқитындар арасынан шығып отыр.
Журналистермен кездесуде облыстық денсулық сақтау басқармасының басшысы Сәбит Пазылов пен бас мемлекеттік санитарлық дәрігер Әлия Әбдіқайымова өңірдегі эпидемиялық ахуал жайлы да баян етті. Осы күнге дейін облыста 3544 науқас тіркелген, аптаның алғашқы күні тағы 9 жағдай анықталып отыр. Індетке шалдыққандардың 96,6 пайызы емеліп шығыпты. Қазір инфекциялық стационарда 38 науқас ем алуда, оның 4-еуі жансақтау бөліміне жатқызылған.
Ақпан айынан бастап коронавирус инфекциясына қарсы екпе салынады. Өңірге ресейлік «Спутник V» вакцинасының 80 мың дозасы кезең-кезеңімен әкелінеді. Бүгінде дайындық жұмыстары жүруде.
– Бірінші кезекте ерікті түрде медицина қызметкерлеріне, педагогтерге, созылмалы аурулармен ауыратын топтағы адамдарға салынады. 18 жасқа дейінгі балалар және 65 жастан асқан қарияларға екпе салынбайды. Бүгінде облыс бойынша 154 егу кабинеті белгіленді. Бұдан бөлек, шалғай елді мекенде тұратын азаматтарға вакцина салу үшін 64 жылжымалы егу бригадасы ұйымдастырылды. Вакцина бір адамға екі мәрте салынады. Яғни бірінші екпе қабылданғаннан кейін 21 күннен кейін қайта егіледі, - деді Сәбит Пазылов.
– Егу жұмыстарына көпшіліктің үрке қарайтыны түсінікті. Өйткені, мұндай вирус бұрын болған жоқ. Тағы бір ескерте кетеріміз, вакцина ерікті түрде салынады, – деді облыс бойынша санитариялық-эпидемиологиялық бақылау департаменті басшысының орынбасары Әлия Әбдіқайымова.
