Ертең «Octagon League 15» деп аталатын жарыс өтеді. Ол жерде Қазақстаннан бөлек, Өзбекстан, Тәжікстан және Қырғызстанның спортшылар күш сынасады. Басты бәсеке жартылай орта салмақта өнер көрсететін қос қандасымыз – Сағындық Мұқанов пен Бауыржан Қуанышбаев арасында өтеді. 24 жастағы Сағындық октагонда 11 кездесу өткізіп, сегізінде жеңіске жетті. 28 жастағы Бауыржан жеті бәсекенің бесеуінда басымдық танытты.
Осы жекпе-жекте жеңіске жеткен саңлаққа айтулы ұйымның алтын белбеуі табыс етіледі. Сонымен қатар, аса ауыр салмақтағы еліміздің қос алыбы – Ілияс Елеусінов пен Александр Кроль арасындағы бәсеке де көпшіліктің қызығушылығын тудырады деген ойдамыз.
Ал жұма күні «Naiza Fighting Championship 28» додасы ұйымдастырылады. Украина, Ресей, Өзбекстан, Қырғызстан және Қазақстанның спортшылары сайысқа түсетін турнирдің басты жекпе-жегінде жеңіл салмақтағы жерлестеріміз – Серікбай Ходжабаев (9-3) пен Фаниль Рафиков (18-4) айқасады. Сондай-ақ, UFC-де күш сынасып жүрген қазақтың қайсар ұлы Шавқат Рахмоновтың туған қарындасы Сора да дәп осы жарыста өз өнерін ортаға салады.
