Картина құдық қазушы Еңсептің оқиғасын баяндай отырып, менмендік, бақталастық, махаббат, достық, қастандық сынды шым-шытырық дүниелерді арқау етеді.
«Бұл әрине, қазақ прозасының шоқтығы биік туындысы саналатын Ә.Кекілбаевтің «Шыңырау» повесіндегі ешкімді жайбарақат қалдырмайтын ғаламат идеясын көркемдеп экранға шығару үшін тер төккен түсіру тобының жемісті еңбегінің арқасында жүзеге асып отырған жетістік деп ойлаймын», дейді фильм режиссері Жаңабек Жетіруов.
Фильмнің түсірілім жұмыстары Маңғыстау өңірінде өтті. Картинада басты рөлдерді Асылхан Төлепов, Алдабек Шалбаев және Айжан Жетіру сомдаған.
2009 жылы негізі қаланған Балқан аймағындағы ең ірі байқаулардың бірі – Sofia MENAR Film Festival кинофестивалі жыл сайын өз көрермендеріне киногерлер шығармашылығында бейнеленген ислам әлемінің мәдениеті және дәстүрімен таныстырып отырады. Фестиваль шеңберінде Таяу Шығыс, Орталық Азия жән Солтүстік Африка мемлекеттерінің ең үздік көркем, деректі және қысқаметражды туындылары көрсетіледі. Айта кетсек, биылғы фестивальдің конкурстық бағдарламасында ұсынылған 13 фильмнің ішінде Әзиз Зайыров және Мұхамед Мамырбеков түсірген «Қыз бен теңіз» фильмі де бар.
