«Ауданда Индустрияландыру картасы аясында бірнеше жобаны іске қосу жоспарланды. Соның ішінде биыл жүзеге асатын «Meken Chiken» ЖШС-нің «Бройлерлік құс етін өндіру кешенін салу» жобасы да бар. Жобаның құны – 5,9 млрд теңге. Бұл жоба іске қосылғанда 79 адам жұмыспен қамтылады. Ал, «Жумағалиева» шаруа қожалығы жылыжай жобасын іске қосқалы отыр. Жылыжай жобасының құны 1,2 млрд теңгені құрайды. Жаңа жылыжайда 40 адам жұмысқа тартылатын көзделген. Қазір жылыжайдың құрылысы басталды. Оған 16 гектар жер учаскесі бөлінді», деді Мұқаш Зұлхарнай.
Оның айтуынша, былтыр Махамбет ауданында Индустрияландыру картасы аясында төрт жоба іске қосылған. Оның үшеуі «Бірінші мамыр» ЖШС-не тиесілі болып отыр. Бұл серіктестікте сүт өндіру зауыты, биогумус өндіру кешені мен сүт өңдеу фермасын кеңейту жобалары жұмыс істей бастады. Сондай-ақ, «Сарайшық АТШ» ЖШС ешкі сүтін өндіру фермасын ашты. Аталған жобаларда ашылған жұмыс орындарына 125 адам тартылды.
