1934 жылы құрылған факультет 2011 жылдан бері мамандар даярлауда қосымша міндеттер жүктелуіне байланысты биология және биотехнология факультеті болып қайта құрылған. Қазіргі кезде факультеттегі студенттер саны 2 451 болса, оның 155-і – шетелдіктер. Студенттерге 200-ден астам профессор-оқытушылар сабақ береді. «Факультетіміздегі профессорлар мен оқытушылардың 80 пайызға жуығының ғылыми дәрежесі болса, олардың ішінде 6 академик, 20 профессор бар. Профессор-оқытушылар құрамының белсенділігін арттыру нәтижесінде соңғы екі жылда гранттық қаржыландыру көлемі екі есе өсіп, түрлі бағыт бойынша халықаралық ынтымақтастықты кеңейту жұмыстары жүзеге асып келеді. Білім және ғылым министрлігінің бағдарламасы бойынша 30-дан астам студент академиялық ұтқырлық шеңберінде Еуропалық жоғары оқу орындарында, атап айтқанда, Франция, Италия, Норвегия, Германия, Испанияда білім алу мүмкіндігіне ие болды. PhD докторанттарды 25-тен астам елдің ғалымдары бірлесіп даярлауға қатысуда. Факультет соңғы бес жылда 30-дан астам ғалымды дәріс оқуға және бірлескен зерттеулер жүргізуге шақырды. Ал биылғы оқу жылынан бастап, бірқатар елден 5 ғалым онлайн режімінде дәріс оқуға шақырылды», деп атап өтті Б.Қазиханұлы. Ал факультеттегі 2 ғылыми зерттеу институты – биология және биотехнология мәселелері институты, экологиялық мәселелер институты, 4 ғылыми-зерттеу орталығы – биобаза, агробиостанса және биологиялық объектілерді физикалық және химиялық әдістермен зерттеу зертханасының өз алдына мүмкіндігі зор.
Б.Қазиханұлының айтуынша, ҚХР, Моңғолия, Мысыр, Украина, Өзбекстан, Түрікменстан, Пәкістан, Ауғанстан және басқа да елдерден оқуға түсіп, ғылыми жұмыстарын сәтті қорғап жүрген студенттер – университет мақтанышы. Өйткені олар шетелде де еліміздің даңқын асыратыны анық. Осы орайда ғылыми бағыттағы жұмыстарды күшейту және оң нәтижелер беретін ғылыми кадрларды даярлау тұжырымдамасы мен бағдарламасы әзірленді. Бұл шаралардың барлығы профессор-оқытушылар құрамының, сондай-ақ жас ғалымдар мен докторанттардың ғылыми жарияланымдық белсенділігінің артуына ықпал етті. Нәтижесінде, 2019-2020 оқу жылында факультеттің Scopus деректер базасында индекстелетін ғылыми журналдардағы жарияланымдар 90-ға жеткен. Оның жартысы шетелдік ғалымдармен бірлесе жарияланды.
«Факультеттің еңбек сіңірген профессорлары мен жас ғылыми зерттеушілеріне ғылым мен оқу процесінің дамуына қосқан үлесі үшін түрлі мемлекеттік марапаттар мен стипендиялар беріліп жатады, бұл мемлекеттің ғылым саласына жасалған қамқорлығы», деді Б.Қазиханұлы. Ол жас оқытушылардың ғылыми өсуі, оларды материалдық-техникалық тұрғыдан қолдау маңызды екенін айта келіп, бұл бағытта арнайы мамандандырылған жабдықтар алынғанын жеткізді.
Ғылым тоқтаусыз алға жылжып келеді. Бұл ретте студенттердің жоғары технологияларды, цифрлы жүйені уақыт оздырмай меңгергені маңызды. Ғылыми мектептердің құрылуы, осы саладағы зерттеулерді жүргізу үшін шаруашылық келісімшарттардың жасалуы және факультеттің жұмысын ұйымдастыру мен басқаруды күшейту озық ғылыми жетістіктерге жетелейтіні анық.
АЛМАТЫ
