Салтанатты кеш барысында театр директорының орынбасары Алмас Шоман музыкалық қойылымға келген медицина қызметкерлеріне ұжым атынан алғысын білдірді.
– Жазушы М.Әуезовтің «Абай–Тоғжан» музыкалық драмасы бүгін медицина саласының қызметкерлеріне арнайы сахналанды. Қазіргі пандемия жағдайында ауыр індетпен күресіп жатқан дәрігерлердің еңбегі орасан екені бәрімізге мәлім. Біздің әртістеріміздің сіздерге арналған қошеметі мен құрметін қабыл алыңыздар, – деді ол.
Қойылымды тамашалауға 50-ге жуық медицина қызметкері жиналды. Атап айтсақ, Нұр-Сұлтан қаласының №4, №7, №9 қалалық емханаларынан және Ұлттық нейрохирургия орталығы мен Ұлттық ғылыми кардиохирургия орталығынан келді.
– Бүгінгі қойылымдағы актерлердің шеберлігі мен музыкалық аспаптардың жанды дыбыстары жанымызды жадыратпай қоймады. Біз өте қуаныштымыз. Театр ұжымы бізге осындай керемет көңіл күй сыйлады, шаттана отырып тамашаладық. Сол үшін алғысымды білдіремін. Коронавирустың емі табылып, тезірек бүкіл әлем пандемияның құрсауынан шықса екен деймін. Еліміз аман болсын, – деді №4 қалалық емхананың дәрігері Арайлым Сейданова. Ал №9 қалалық емхананың мейірбикесі Назерке Бердалиева қойылымның жоғары деңгейле өткенін атап өтіп, ақ халатты абзал жандардың еңбегін ерекше бағалап, құрметпен қараған театр ұжымына алғысын білдірді.
«Абай-Тоғжан» музыкалық драмасы – қазақтың ұлы ақыны Абай Құнанбайұлының бозбала кезінен көрініс беріп, алғашқы махаббатын сипаттайтын сахналық туынды. Спектакльдің инсценировка авторы Мирас Әбіл, режиссері Қазақстанның еңбек сіңірген қайраткері Асхат Маемиров, қоюшы-режиссері Алма Сырбаева, композиторы Бауыржан Ақтаев, балетмейстері Шырын Мұстафина, хормейстері Ғалымжан Берекешев.
