Аталған музей директорының орынбасары Дәурен Жүсіпов көне тағамдар халық мұрасы болғандықтан, ескіден келе жатқан рецептер туралы мағлұматтарды тереңдетудің маңызды шаруа екенін айтады.
– Жоба идеясына біздің елордалық әріптесіміз, Ұлттық музей жанындағы «Халық қазынасы» ғылыми-зерттеу институтының материалдық емес мәдени мұра бөлімінің басшысы Әйгерім Мұсағажинованың еңбегі игі ықпалын тигізді. Ол өзінің ғылыми еңбектерінде қазақ рецептерінің 200-ден астам ұмытылған түрін жинап, аймақтарға, соның ішінде Осакаров және Қарқаралы аудандарына экспедициялар ұйымдастырды, – дейді ол.
Мұражай қызметкерлері көне рецепт негізінде қазақтың ұлттық тағамының бірі әсіпті әзірлеуді жаңғыртты. Негізінде бұл тағамды әзірлеудің бірнеше әдісі бар екен және ол аймақтарда әртүрлі аталатын көрінеді. Кейбір жерде оны шұжық деп те атайды. Әдетте бұл тағам қой сойылған күні дайындалады. Алдымен малдың ішегі айналдырылып, ол мұқият жуылып, тазартылады. Ет пен бауыр ет тартқыштан өтіп, дәмдеуіштер қосылғаннан кейін, оған тартылған күріш салынады. Содан кейін аз мөлшерде су құйылып, өнім мұқият араластырылады. Дайындалған тағам ішекке толтырылады да, екі жағынан түйіліп байланады. Ауа шығару үшін әсіп бірнеше жерден инемен тесіледі екен. Сонан соң оны су құйылған қазанға салып, 50-60 минуттай қайнатады. Дастархан басында әсіпті жапырақтап турап, ыстық немесе салқындатылған күйінде береді.
Тарихи-өлкетану мұражайының қызметкері Нарша Еркінқызы әр айдың соңында көне рецепт негізінде «тірілген» тағамдар бойынша бейне ролик түсіруді жоспарлап отырғандарын айтады. Бұдан бөлек, алдағы Наурыз мейрамында «Атадан қалған адал ас» жобасы аясында мерекелік тағамдарды таныстыру іс-шарасы да жоспарда бар екен.
Қарағанды облысы
