Суретті түсірген Тілеубек Шаяхмет
Олардың 160-тан астамы вакцинаны облыстық ана мен бала орталығындағы екпе кабинетінде салғызды. Коронавирус инфекциясына қарсы екпе алғандардың қатарында әкімдіктің мамандары мен санитарлық-эпидемиялық қызметтің өкілдері де бар. Жалпы екпе алу орталықтарына келген пациенттерді алдын ала тексеріп, терапевт дәрігер рұқсат береді. Екпеден кейін де арнайы бөлмеде белгілі бір уақыт дәрігерлердің бақылауында болады.
– Біз – қызық халықпыз. Естеріңізде ғой, былтыр жазға салым жақындарымыз ауыра бастағанда «басқасының бәрін ойлап тауып жатқан ғалымдар тажал індеттің бетін қайтаратын екпе ойлап таппай ма?» деп тулағанбыз. Бүгінде сол екпені ойлап тапты. Енді «салдырмаймын» деп қашып жүргендер көп. Өзім ешкімнің қолқалауынсыз келдім. Екті. Бәлендей теріс әсері жоқ, – дейді екпеден кейінгі бөлмеде отырған пациент Әсем Жеңісова.
Иә, екпеден бас тартып жатқандар аз емес. Тұмауратып жүрген азаматтың бірі вакцина салуға мүлде қарсы екенін айтты. Әрине, вакциналау әркімнің қалауымен болғандықтан, ешкімді ешкім қыстамайды, күштемейді. Дәрігер Ақбөпе Тұрсынбаеваның айтуынша, алғашқы күндері күніне отыз адамға дейін келіп екпе алған.
– Екпеден ерікті түрде бас тартқандар да бар. Вакцина аламын деген азаматтар моральдық тұрғыдан дайын болуы керек. Баса айта кетерлігі, вакциналауға басымдық берілген сегіз контингент белгіленген: медицина қызметкерлері, педагогтер, полиция қызметкерлері. Сондай-ақ, қант диабеті бар, қан қысымы жоғары, өкпенің созылмалы аурулары, бронхиалды демікпесі бар адамдар бірінші кезекте алуы тиіс. Себебі олардың иммуниттері төмен, – дейді А.Тұрсынбаева.
Ал екпе салудың өз тәртібі бар. Өскемен мен Семейге ресейлік Спутник V вакцинасының 270 дозасы жеткізілген болатын. Олар нұсқаулығы бойынша -18 градуста сақталып тұр. 3 мл-дық бір құты бес адамға салынады.
– Вакцинаны мұздатқыштан бес адам жиналған соң ғана алып шығамыз. Алып шыққан соң, 15 минуттан кейін сала беруге болады. Ашылған вакцинаны бөлме температурасында екі сағаттан артық ұстауға болмайды, – деп түсіндірді екпе кабинетінің медбикесі Гуля Омарова.
Медбикенің айтуынша, екпе салған жер қызарып, дене температурасы аздап көтерілуі мүмкін. Екпенің нұсқаулығында үш күн ішінде қызу 40 градусқа дейін көтерілуі ықтимал деп жазылған. Бұлшық еттері ауырып, сүйектері де сырқырауы мүмкін. Оған алаңдаудың қажеті жоқ. Дәрігер үш күн бойы пациенттерге хабарласып, хал-жағдайларын біліп тұрады. Осы уақытқа дейін екпе алғандардың арасында бұлшық еті ауырсынып, дене қызуы көтерілгенмен, ауыр жағдайлар орын алмаған.
Шығыс Қазақстан облысы
