Статистикалық мәліметтерге жүгінсек, спорттың бұл түрінде Норвегияның алдына түсетін ешкімнің жоқтығын аңғару қиын емес. Олардың командалық есепте көш бастап келе жатқанына 20 жылдан аса уақыт болды. Тарқатып айтсақ, 1999-2019 жылдар аралығында Рамзау, Лахти (екі рет), Валь-ди-Фемме (екі рет), Оберстдорф, Саппоро, Либерец, Осло, Фалун және Зефельдте ұйымдастырылған жарыстарда Скандинавия түбегінің түлектері топ жарды. Осыдан екі жыл бұрын Аустрияда өткен дүбірлі додада да сарапқа салынған 22 бас жүлденің 13-ін норвегиялықтар олжалаған болатын. Алты алтыны бар Германия құрамасы екінші орынды иеленсе, қос шаңғышысы теңдессіз деп танылған Швеция командасы үшінші сатыға табан тіреді.
Ал ертең басталатын әлем чемпионатыда Қазақстанның намысын Евгений Величко, Олжас Климин, Константин Борцов, Наиль Башмаков, Виталий Пухкало, Анна Шевченко, Дарья Ряжко, Ольга Мандрика, Ирина Быкова, Валерия Тюленева және Айша Рақышева сынды спортшылар қорғайды.
