Қоғам • 03 Наурыз, 2021

Офтальмологиялық орталық қызметі кеңейді

20 рет көрсетілді

Көру қабілеті нашарлаған кезде қолданылатын әртүрлі көзілдірік түрлері, жанаспалы линзалардың тарағаны белгілі. Ал қазір көзге лазерлік коррекция жасатуға сұраныс артып отыр. Әрине, көзі нашар көретін адамды бұл қаншалықты қауіпсіз, лазерлік коррек­ция­­дан кейін көз анық көре бастай ма деген сұрақ мазалары сөзсіз.

Павлодар өңірінде 15-ке жуық көз ауруларын емдейтін, опе­­­рация жасайтын емханалар бар. Көпшілігі облыс орта­лы­ғын­да ор­наласқан. Мысалы, облыс орта­лығындағы Г.Сұлтанов атын­дағы облыстық ауру­ха­наның офтальмологиялық бө­лімшесін жоғары санатты бі­лі­к­ті офтальмолог-дәрігер Қасымхан Тілеубаев басқарады. Көз емдеу бөлімінде заманауи офтальмологиялық құрал-жаб­дықтармен емдеп, түрлі күр­делі операциялар жасалып келеді. Бөлімше дәрігерлері зама­на­уи жабдықтармен – офталь­мологиялық коагуляциялаушы лазерде, когерентті томографта, ультрадыбыстық операциялық жүйе арқылы емдеу шараларын жүргізеді. Орталықта жылына 4 мыңнан астам операция жасалады, көру қабатын лазер арқылы емдейтін мүмкіндік те бар. Жаңа лазерлі аппараттарды қол­данғаннан бері офталь­мо­логия­лық бөлімшеде ем алатын науқастардың кезегі азайды.

Офтальмологиялық бөлімше дәрігерлері лизинг бойынша алынған ең заманауи құралдарда – офтальмологиялық коагулярлы лазерьде, когеренттік томографта, INFINITI, STELLARIS ультрадыбыстық операциялық жүйесінде жұмыс істейді. Орталық көз хирургиясына имплан­та­циялық жолмен опера­ция жасау қолға алынды. Глаукомаға қарсы лазерлік операция жасалады. Оптикалық көз томографы сатып алынды. Лазерлі аппарат, микрос­коп, тігіссіз ота жасайтын машиналар бар.

Бүгінде балалар да смартфон мен гаджет қолданады. Осыдан-ақ көз ауруларының қа­лай пайда болатыны, тіпті 5-6 жас­тағы ба­лалардың көру қабілетінің күрт нашарлауы байқалуда. Бұл  көз емханаларында, мектептерде, көпшілік жүретін орындар­да смартфон, гаджет­терді қалай пайдалану жай­лы ата-ана­лар­ға түсіндіретін, көз ауруынан сақ­тан­ды­ратын ақпарат­тық жұ­мыс­тың қажеттігін де бай­қа­тады.

– Әрине, ақпараттандыру кез келген сырқаттың алдын алады. Біз арнайы медициналық жабдықтардың көмегімен тек­се­реміз, емдейміз, түрлі оталар да жасалады. Ең бастысы, бар­лық дәрігерлер секілді көз дәрігеріне де сезімталдық пен жанашырлық, көзі ауырған адамға көңіл бөлу, жан жылуы қажет, – дейді Қ.Тілеубаев.

Жуырда облыс орталығындағы Ә. Бектұров көшесі, 103 мекенжа­йын­да «Көз емдеу емханасы» ашыл­ды. Емханада көздің кө­ру қабілетін жақсартатын ла­зерлік түзету жасалады. Офталь­мо­ло­гия­лық орталық «Биз­нестің жол картасы 2025» бағдарламасы бойынша мем­ле­кеттік қолдау негізінде жаңа ғи­маратқа орналасты. Бұған дейін өңірде көз емдеудің түрлі қыз­мет­тері ұсынылғанымен, кө­ру қабілетіне лазерлік ота жасату үшін шетелге бару қажет болатын-ды. Енді міне, алыстан жасалатын лазерлік операцияларды жергілікті жерде жүргізуге мүмкіндік беретін жаңа технологиялары бар орталық ашылды. Өңір тұрғындары үшін ерекшелігі бар бұл жобаның тиімділігі де осында. Облыс әкім­дігінің мәлі­ме­тінше, 2016 жылдан бас­тап жұмыс істейтін емханаға биыл «Орталықты қайта құру және қайта жабдықтау» барысында аталған  бағ­дарлама бо­йынша 213 млн тең­геден астам же­­ңілдетілген несие берілген. Жоба сәтті аяқталып, жуыр­да ем­­хана пайдалануға берілді. Ем­ха­нада диагностикалық кешен және тәулік бойы жұмыс істейтін стационар бар. Енді орталықта жалпы көз патологиясын анықтау және емдеу, сондай-ақ көздің бұл­дырауы, глаукома, көздің арт­­қы бөліктеріне оталар жасалады. Алдағы айда орталықта көз­дің көру қабілетін жақсартатын лазерлік түзету жүргізіле бастайды.

– Қазір емханада құрамын жер­гілікті мамандар құрайтын 6 офтальмохирург бар. Кеңейтіл­ген­нен кейін мамандарды да көбейту ойы­мызда. Өйткені қазірден-ақ емхана келушілер аз емес. Егер бұрын жыл сайын 2,5 мың пациентті қа­былдап, 1 мың адамға дейін опе­рация жасаған болсақ, енді бұл көрсеткіштер 2 есеге ұлғаюы тиіс, – дейді бас дәрігер Айжан Ахмерова.

Тағы бір ерекшелігі, тәулік бойы жұмыс істейтін стационар арқылы тегін медициналық кө­мек­тің мемлекеттік көлемі шең­бе­рін­де емделушілерді қабыл­дау­ға дайын. Бұл облыс ор­та­лығындағы өзге көз ем­дей­тін емханалардағы ке­лу­ші­лер жүктемесін де жеңіл­де­теді.

– Көзді лазерлік коррекциялау технологиясы елімізге алғаш рет 2005 жылы келді. Тәжірибе жи­нақталып келеді. Операция жа­салғаннан кейін көз ауырмаса да қолды тыюға тура келеді. Қыз-ке­лін­шектерге боянуға болмайды. Көзге тамызатын дәрі-дәр­мек­тер мен көз күтіміне қажет ке­ңес­терімізді жазып береміз, – дейді офтальмолог дәрігер Марат Сембин.

Офтальмолог дәрігерлердің айтуынша, көзді еш уақытта қолмен уқа­лауға, сүртуге болмайды, тек таза, жұмсақ шүберекпен сүрту ке­рек. Жаз айларында тікелей тү­се­тін күн сәулесінен және шаң тозаң­нан қорғанып көзілдірік киген де дұрыс.

 

Павлодар облысы

 

Соңғы жаңалықтар

9 су қоймасы салынады

Экология • 22 Қазан, 2021

Ұқсас жаңалықтар