Атап айтсақ, бұл қатарда театрландырылған қойылым, фестиваль, көрме, лекция, ғылыми конференция, шеберлік сабағы, арнайы онлайн платформа, челлендж, акция, флеш-моб сынды көптеген мәдени жобалар бар. Аталған іс-шаралар ұлттық мәдениетті ілгерілетуге, салт-дәстүрлерді жандандыруға, саламатты өмір салтын насихаттауға, бұқаралық спортты, соның ішінде ұлттық спорт түрлерін дамытуға бағытталған.
Биыл, әсіресе, көктемнің алғашқы айы, береке маусымы – наурыз айына ерекше мәртебе берілді. Яғни республикалық жалпы жоспар бойынша наурыз «Қазақтың ұлттық мәдениеті мен дәстүрі» айы ретінде белгіленді. Бұл айда елдік мерейтойының мазмұнын байытуға арналған бірқатар мәдени іс-шаралар өтеді деп жоспарлануда. Олай болуы заңды да. Өйткені наурыз − мерекеге ең бай маусымның бірі. Мәселен, айдың алғашқы күні Алғыс айту күні болса, 8 наурыз – Халықаралық әйелдер күні, 22 наурыз – шығыс халықтарының Жаңа жылы. Демек, бұл айдағы түрлі іс-шаралар легі наурыздың алғашқы күнінен бастап, соңына дейін жалғасады.
Сонымен айтулы шаралардың бірқатарына тоқталып өтсек, наурыздың ең ерек мерекесі − 1 наурыз Алғыс айту күніне орай елімізде 250-ге жуық арнайы жоба өтті. Оның 60-тан астамы республикалық ұйымдар еншісінде. Мәселен, «Астана Балет» мемлекеттік опера және балет театры дәрігерлерді «Шымылдық құпиясы» жобасымен қуантса, «Қазақконцерт» ұжымы мұғалімдер мен дәрігерлерге «Мейірімді болайықшы, бауырлар» концертін ұсынды. Ал Алматыдағы Ғ.Мүсірепов атындағы Қазақ Мемлекеттік академиялық балалар мен жасөспірімдер театры ұстаздарға арнап «Мұғалім» қойылымын, елордалық Музыкалық жас көрермендер театры «Шәмші» мюзиклін, Қ.Қуанышбаев атындағы мемлекеттік академиялық қазақ музыкалық драма театры дәрігерлер, мұғалімдер мен экологтарға арналған «Тыңда» атты музыкалық кешін тарту етті. Сонымен қатар М.Лермонтов атындағы Мемлекеттік академиялық орыс драма театры «Адал әйел» («Верная жена») спектаклін, Ұлттық кітапхана №1 балалар үйін қолдау мақсатында «Аялы алақан» қайырымдылық акциясын, «Бозоқ» мемлекеттік тарихи-мәдени музей-қорығы Қазақстан халқы Ассамблеясы өкілдерінің қатысуымен «Отаным болған қазақ жеріне алғыс айтамын!» дөңгелек үстелін өткізді.
Мәдениет және спорт министрлігінің 8 наурыз Халықаралық әйелдер күніне жоспарлаған жобалары да көңіл қуантады. Атап айтсақ, «Бейнелеу өнері туындыларындағы әйел бейнесі» көрмесі, Ш.Айманов атындағы «Қазақфильм» қорындағы ұлттық фильмдер көрсетілімі, «Әдебиеттегі әйел жазушылар» дөңгелек үстелі, «Астана Опера» мемлекеттік опера және балет театрында өтетін П.Чайковскийдің «Аққу көлі» балеті, «Астана Балет» театрының «Гала жұлдыз» гала-концерті, Қ.Қуанышбаев атындағы Мемлекеттік академиялық қазақ музыкалық драма театрының «Зере» қойылымы, Құдыс Қожамьяров атындағы мемлекеттік ұйғыр музыкалық комедия театрының «Табассум» мерекелік бағдарламасы, Алматы қаласы әкімінің эстрадалық-симфониялық оркестрінің концерті сынды бірқатар мерекелік іс-шара легі әйелдерге арналған мейрамды одан әрі көріктендіре түсері сөзсіз.
Сондай-ақ 14 наурыз Көрісу күні қарсаңында елордадағы Қ.Қуанышбаев атындағы Мемлекеттік академиялық қазақ музыка драма театры ұжым ардагерлерімен кездесу, «Бозоқ» мемлекеттік тарихи-мәдени музей-қорығы «Амал-көрісу мерекесі Қазақстанның ежелгі географиясы мен қазіргі мәдениеті аясында» атты дәріс ұйымдастырса, М.Әуезов атындағы Қазақ ұлттық драма театры «Жүз жылдық махаббат», «Оң қол» драмаларының көрсетілімін, Ғазиза Жұбанова атындағы Ақтөбе облыстық филармониясы «Көрісейік, ағайын!» концертін, Асқар Тоқпанов атындағы Жамбыл облыстық қазақ драма театры «Көрісу дәстүрі» спектаклін көрермен назарына ұсынады.
Ал күллі түркі халқы үшін жаңарудың символына айналған Наурыз мерекесінің орны ұлтымыз үшін тіптен ерек. Ұлыстың ұлы күні қарсаңында, яғни 21 мен 23 наурыз аралығында елімізде 500-дей іс-шара ұйымдастыру жоспарлануда. Олардың қатарында ұлттық тағам түрлерінің жәрмеңкесі, өлкетану экскурсиялары, концерт, квэст, этнокөрме, театрландырылған қойылымдар бар.
«Халқымыз үшін Тәуелсіздік ұғымының мәні неде?», «Қазақстан ғасырлар бойы армандаған азаттыққа қалай қол жеткізді?». Міне, осы тектес сан сауалды арқау еткен дөңгелек үстел, дәріс пен сынып сағаттары, ұлттық музыка аспаптарының фестивалі ұйымдастырылады. Сонымен қатар республикалық кітапхана зағип және нашар көретін азаматтарға арналған зағип және нашар көретін ақындардың «Тұғыры биік Тәуелсіздік» атты аудио форматтағы жыр жинағының тұсаукесерін өткізеді. Бұдан бөлек, республикалық неміс драма театры «Қарагөз» спектаклін, «Ұлытау» ұлттық тарихи-мәдени және табиғи қорық-мұражайы «Мәңгілік елдің мәртебелі Наурызы» атты көрме мен экскурсиясын, Сүйінбай атындағы Алматы облысының филармониясы «Хош келдің, әз-Наурыз» ән кешін, Алматы қаласының «Сазген сазы» фольклорлы-этнографиялық ансамблі «Ұлыстың ұлы күні» концертін ұсынады. Бұл жиындардың ұлттық салт-дәстүрлерді жаңғыртуға, экология мәдениетін қалыптастыруға, халық арасындағы достық байланысты нығайтуға оң ықпал етері сөзсіз. Аталған іс-шараның барлығы «Әз Наурыз – ұлттық сананың, ұлттық бірліктің жарқын көрінісі» деген ұранмен өтеді.
Жалпы, Тәуелсіздіктің 30 жылдығын атап өтуге бағытталған іс-шаралар жоспары қоғамның тұрақты дамуына жағдай жасайтын жоғары білімді, интеллектуалды және рухани жан дүниесі бай ұлт қалыптастыруға серпін береді деп күтілуде.
