Медицина • 04 Наурыз, 2021

3 миллион қазақстандық медициналық сақтандырудан неліктен тыс қалды?

Отандық медицина саласына серпіліс әкеліп, азаматтардың ем қабылдауын әлдеқайда жеңілдетуі тиіс болған міндетті әлеуметтік медициналық сақтандыру (МӘМС) жүйесі әлі 3 миллионнан астам адамды қамти алмай отыр.

Абай ҚАЗБЕКҰЛЫ

«Әлеуметтік медициналық сақтандыру қорының» басқарма төрағасы Болат Төкежановтың айтуынша, міндетті медициналық сақтандыру жүйесі қазіргі таңда 16 млн қазақстандықты немесе ел тұрғындарының 84 пайызын қамтыған. 3 миллионнан астам адам сақтандыру игілігін көреалмай отыр. Олардың 1,6 млн-ында төлем тұрақты жүргізілмеген, 1,4 млн-ы жыл бойы бірде-бір рет аударым жасамаған.

– Жазда, 42 500 теңге төлемі жүріп жатқан кезде жеке тұлғалар бірыңғай жиынтық төлем жасады. Осы үрдіс сақталған болса МӘМС жүйесі ел тұрғындарының 92 пайызын қамтушы еді. Халықты МӘМС-ке тарту бойынша жүйелі жұмыстарды жалғастыру қажет. Өңірдегі әкімдіктер «Атамекен» кәсіпкерлер палатасын, мемлекеттік кірістер комитеті аумақтық бөлімдерін және медициналық ұйымдарды тарта отырып аймақтық штабтардың тиімділігін арттыруы керек, – деді Төкежанов.

Әсіресе, Жамбыл, Түркістан, Алматы, Қостанай облыстарында сақтандырылған азаматтар саны 80 пайыздан төмен көрсеткішке ие екен.

Былтыр медициналық сақтандыру жүйесіне жарналар мен аударымдар түрінде 550 млрд теңге келіп түскен. 15 жеңілдік категориясы бойынша мемлекеттік транш 297,6 млрд теңгені құраған. Бұл барлық түсімдердің 54 пайызы. Жұмыс берушілер өз жұмысшылары үшін 162 млрд теңге аударған.

– Жұмысшылар жарнасы 72,2 млрд теңге болды. Жеке кәсіпкерлер 10,4 млрд теңге, азаматтық-құқықтық негізде жұмыс істейтін азаматтар 2,3 млрд теңге, бірыңғай жиынтық төлем төлеушілер 2,8 млрд теңге, өз-өзін жұмыспен қамтушылар 2,3 млрд теңге аударды. МӘМС жүйесіне аударым жасау бойынша Нұр-Сұлтан, Алматы қалалары және Қарағанды облысы көш басында. Батыс Қазақстан, Қызылорда, Солтүстік Қазақстан облыстарында төлем деңгейі төмен, – дейді спикер.

Ресми дерек бойынша, 2020 жылдың қорытындысында қор активтері есебінен стационарларда 1 млн-нан астам науқас емделген. Осы мақсатта 170 млрд теңге жұмсалған.