Аймақтар • 05 Наурыз, 2021

«Алтын алқалы» Айым

743 рет көрсетілді

Шаңырағын бала үнімен шаттандырған алтын құрсақты аналарымыздың жолын жалғаған жастардың бірі – шалқарлық «Алтын алқа» иегері Айым Сүйеуқұлова. Жолдасы Азамат екеуі өмірге 9 бала әкеліп, оларды қатарынан қалдырмай бағып, тәрбиелеп отыр. Тоғызыншы перзенті Санжар бүгінде тоғыз айлық болса, тұңғышы Назым 8-сынып оқушысы. Араларында Аида, Айша есімді егіз қыздары бар.

– Екеуміз де Шалқардың тумасымыз, бір мектептен білім алдық, бір-бірімізді бала кезден танимыз десек те болады. Осы таныстығымыз есейген шақта махаббатқа ұласып, отау құрдық. Көп балалы отбасы атанудың ата-анаға жүктер жауапкершілігі де мол. Жұбайым екеуміз күнделікті тірлікте кезігетін қиындықтарға мойымай, бәріне түсіністікпен қарауға тырысамыз. Бізге бала­лар­дың шат күлкісін көруден асқан қуаныш жоқ, байлығымыз да осы – соңымыздан ерген кіш­кентайларымыз.  «Әр баланың өз несібесі бар» демекші, көз ал­дымызда аман жүріп, есейсе болды,– дейді 30 жастағы көп балалы ана.

Кейде көп балалы отбасылармен тілдескенде олардың тарапынан бір мұқтаждығы  айтылып, бір сәлемдемесін жеткізетін болып міндет арқалап қайтатынсың. Бұл жолғы кейіпкерлерімізден барға қанағат, жоққа сабыр тіле­ген  қарапайымдылықты көр­дік. Айымның  аспаздық ма­ман­дығы бар. Бірақ тұрмыс құр­ғалы осы Алла сыйлаған бө­пе­лерінің тәрбиесімен үйінде отыр. Солардың сабақтарына қа­рай­ды, балабақшаға апара­ды, онда ұйым­дастырылатын түрлі шараларға қатысып, балаларын қуантады. Қайырымды­лық ак­цияларына да өз үлестерін қо­су­ды ата-аналық борыштарына санайды.

Айым – «Баласы атқа шапса, үйде отырып тақымын қыс­­қан» ілкідегі алтын құр­сақ­ты ана­­лардың жұрнағы еке­ні дау­­­сыз. «Аға, біздің от­ба­­сы ту­ралы жазсаңыз бал­а­ла­рым-
ның жетістіктерін де қалдырма­ңыз­шы...» деп өтінді. Бала жетіс­тігі – ата-ана қуанышы деген осы.

Мектепке баратын бесеуі де оқу озаттары,  спорттан жақсы көрсеткіштері бар. Үлкені Назым бос уақытында Оқушылар сара­йындағы қолөнер үйірмесіне қа­тысады. Ол ұсақ моншақтармен тоқуға кішкентайынан  бейім екен. Қазір сол қабілетін үйірмеге қатысып, шыңдап жүр. Әнуар есімді ұлдары №1 Шалқар  балалар мен жасөспірімдер  спорт мектебінде грек-рим күре­сі­нен үйірмеге қатысады, ал Гүл­­бар-­­
шын есімді қыздары №2 бала­лар мен жасөспірімдер спорт мектебінде дзюдомен шұғыл­дан­ады. Спортқа икемді осы екеуі аудандық, облыстық, респуб­ликалық сайыстарда бірнеше мәрте жүлдегер атанып, медаль­д­ар иеленген. Егіз қыздары мек­тепішілік білім бәйгелерінде жақ­сы нәтиежелер көрсетіп, озат оқу­шылар қатарында тұр.

№6 орта мектебінің 3-сыны­бында оқитын дзюдошы Гүл­баршын «Мен болашақта кім бо­ла­мын?» деген тақырыпта жаз­ған шығармасында «Ең алды­мен адамгершілігі мол жақсы адам, білімді оқушы, елімнің пат­риоты болғым келеді...», деп бастап, он саусағынан өнері тамған шебер болғым келеді деп ойын түйіндепті. Өйткені бұл әулеттің арғы аталарында ісмерлік қасиет бар екен. Осы  шығармасы өткен жылы «Қазақстанның 100 үздік дарынды оқушысы» атты республикалық байқаудың материалдар жинағына еніп, еліміздегі «Bilim-orkenieti» ұлт­тық инновациялық ғылыми-зерттеу орталығы бекіткен «Қа­зақстан Республикасының дарынды оқушысы» атты төсбелгісі мен куәлігін иеленіпті.

Оқуға зейінді, өнерге құш­тар өрендердің әкесі Азамат Хадим­жан қазір «Казтелерадио» АҚ-ның Шалқар телеорталғында жұ­мыс істейді. Ерге лайықты істің қай-қайсына да қолының ептілігі бар 36 жастағы әке  балалары­ның армандары орындалатынына сенеді.

 

Мұхтар МЫРЗАЛИН,

Қазақстан Журналистер одағының мүшесі.

 

Ақтөбе облысы,

Шалқар ауданы

 

Соңғы жаңалықтар

Асыл ағаның шарапаты

Руханият • Бүгін, 00:08

Құймақұлақ

Руханият • Кеше

Газ бағасы неге қымбат?

Аймақтар • Кеше

Ұқсас жаңалықтар