Аймақтар • 11 Наурыз, 2021

Мүмкіндік толық пайдаланылмай отыр

12 рет көрсетілді

Бүгінде Жамбыл облысы тұрғындарының жиі көтеретін мәселесі баспана болып отыр. Әкімдердің есепті кездесуінде болсын, жеке қабылдауларда болсын, тіпті әлеуметтік желілерде болсын, көптеген тұрғынның көтеріп жүрген өзекті мәселесі осы.

Өңірде жыл сайын жергілікті жұртшылықты тұрғын үймен қамту тиісті деңгейде жүзеге асырылып келе жатқанымен, әлі де мыңдаған азаматтар баспана кезегінде тұр. Мәселен, былтыр облыста 618 мың шаршы метр тұрғын үй пайдалануға берілді. Оның ішінде 155 мың шаршы метр көппәтерлі үй, 463 мың шаршы метр жеке үй бар. Мұның тағы бір себебі, былтыр өңірде пәтерлерге қарағанда жеке үйлер көп салынған. Бұл көрсеткіш кезекте тұрғандардың мәселесін шешіп бере алмайды. Сондықтан аймақта баспана мәселесі талай жылдан бері күн тәртібінен түспей келеді.

Қазіргі кезде тұрғындардың бас­паналы болуы үшін мемлекет тарапынан барлық жағдай жасал­ған. Жамбыл облыстық құрылыс басқармасының басшысы Жайық­бай Шалдаровтың айтуынша, ағым­дағы жылы 721 мың шаршы метр тұр­ғын үй пайдалануға беріледі. Бірақ облыс әкімі Бердібек Сапар­баев пәтер алу үшін мемлекеттік бағ­дар­ламалардың берер мүмкіндігі мол болғанымен, бүгінде оның да толық көлемде пайдаланылмай отырғанын айтқан. Мәліметке сүйенсек, Жамбыл облысы «7-20-25» бағдарламасы шеңберінде рәсімделген несиелер саны бойынша еліміздегі аймақтардың ішінде 14-орында тұр екен. Ал талай жылдан бері тұрғын үй кезегінде тұрған баспанаға мұқтаж әрбір тұрғын күн өткен сайын жақсылықтан үмітті.

Бұл ретте мамандар не дейді? Ұлт­тық банктің облыстық филиалы­ның басшысы Евгений Шарыгин әуелі әлеуетті сатып алушыларды анықтап алып, содан кейін ғана тұрғын үй құрылысын жүзеге асыру керек деген пікірде. Сонымен қатар, «Отбасы банкі» АҚ Тараз қалалық филиалының директоры Гүлзат Бекназарованың айтуынша, «Шаңырақ» бағдарламасын жүзеге асыру бойынша облыс 8-орында тұр екен. Ал «Бақытты отбасы» бағдарламасы шеңберінде өткен жылы 357 отбасы баспаналы бол­ған. «Отбасы банкі» базасында тұр­ғын үймен қамтамасыз ету жөнін­дегі орталық құрылды. Аталған орта­лық тұрғын үй сатып алуға ниетті адамдардың есебін жүр­гізумен айналысады. Халықтың әлеуметтік осал топтарынан кезекте тұрғандарды жеке жалға берілетін тұрғын үйді субсидиялау тетігі арқылы баспанамен қамтамасыз ету жоспарлануда. Ал мемлекеттік қыз­метшілер мен бюджеттік мекеме қыз­меткерлері қатарындағы кезекте тұр­ғандар пәтерді жеңілдетілген займ арқылы сатып алады», дейді ол.

Сондай-ақ, Гүлзат Бекназарова ағымдағы жылдың қаңтар айында Тараз қаласындағы жаңа тұрғын үй бағасының үш пайызға өскенін айтты. Бүгінде мұндай өсім республиканың барлық ірі қалаларында байқалады. Ал қайталама нарықтағы тұрғын үй бағасы да бес пайызға артқан. Бірақ бұл жамбылдықтардың мемлекеттің қолдауынсыз жеке баспаналы болуын одан әрі қиындата түскен. Сонымен қатар, қызметкерлері үшін өз есебінен типтік жоба бойынша тұрғын үй салатын ауылдық жұмыс берушілердің шығындарының бір бөлігін субсидиялау тетігінің әзірлену барысы да әлсіз болып тұр. «Бүгінгі таңда бар-жоғы 43 шаруа қожалығынан 109 ғана ұсыныс түсті. Әрине, бұл мардымсыз көрсеткіш. Бұл ретте аудан әкімдері жұмыс берушілермен түсіндірме жұмыстарын тиісінше жүргізе алмай отыр», дейді Ж.Шалдаров.

Жергілікті тұрғындарды баспанамен қамту биылмен тоқтап қал­майды. Әлі талай мыңдаған шар­шы метр тұрғын үй салынып, пайда­лануға беріледі. Дегенмен, бұл тұр­ғы­да да үй алудың тұрғындар үшін тиімді жағы қаралып, мемлекеттік бағ­да­р­ламаларды пайдалану мәселе­сінің ойдағыдай болғаны дұрыс-ақ.

 

Жамбыл облысы

 

Соңғы жаңалықтар

Алдағы үш тәулікте күн суытады

Ауа райы • Бүгін, 11:55

Ұқсас жаңалықтар