Саясат • 26 Наурыз, 2021

Кадр резерві іріктеуінің бірінші кезеңінен өтті

105 рет
көрсетілді
1 мин
оқу үшін

Кадр резервіне қатысуға 1 650 қазақстандық өтінім берді. Еске сала кетейік, аталған жобаның іске қосылғаны туралы «Азаматтарға арналған үкімет» мемлекеттік корпорациясы 1 наурызда жариялаған болатын, тілек білдірушілердің 12 күн ішінде жеке деректерін толтырып, біліктілігі туралы құжаттарды тапсыру мүмкіндігі болды.

Кадр резерві іріктеуінің бірінші кезеңінен өтті

Тестілеудің бірінші кезеңінен 1 246 адам өтті, үміткерлер логикалық тесті­леудің 78 сұрағына жауап бер­ді. Келесі кезеңге сауалдардың 30%-ына дұрыс жауап берген 1 067 үміткер жіберілді.

Жобаға тіркелгендердің арасында Нұр-Сұлтан қаласы мен Алматы облысының тұрғындары басым (25%-дан астам), ең аз өтінім Павлодар облысынан келіп түскен. Дарындылар пулына қатысушылардың 8%-дан астамының 10 жылдан астам жұмыс өтілі бар. Іріктеудің бірінші кезеңінен өткен үміткерлердің қорытынды тізімі talent.gov4c.kz сайтында жарияланған.

Тестілеудің екінші кезеңінде үміт­кер­лердің Қазақстан Республи­касының заңнамасы бойынша білімі тексері­ле­ді. Қатысушылар ел Конституциясы, «Мемлекеттік қызметтер туралы», «Дербес деректер туралы», «Сыбайлас жемқорлыққа қарсы іс-қимыл туралы», «Жеке және заңды тұлғалардың өті­ніш­тері туралы» және «Акционерлік қоғам­дар туралы» заңдар бойынша 1,5 сағат ішінде 90 сұраққа жауап беруі қажет.

Тестілеуден кейін қорытынды кезеңге өткен үміткерлер мемлекеттік және қоғам қайраткерлерінен, HR-сарапшылардан және мемлекеттік корпорацияның басқарма мүшелерінен тұратын сарапшы кеңес мүшелерімен әңгімелесуден өтетін болады. Жоғары балл жинаған және әңгімелесу кезеңінен сәтті өткен үміткерлер кейіннен тиісті бос лауазымдарға тағайындау үшін дарындылар пулына қабылданады.