Айнұрдың «Алақайы» жеңімпаз атанды

Бірінші маусымға қатысу үшін еліміздің барлық өңірінен мүмкіндігі шектеулі бала­лар­дың аналары, көп балалы аналар шақырылған. Amway қа­йырымдылық қоры, ҚХА Кә­сіпкерлер қауымдастығы, «Ата­мекен» ҰКП және «Қазақстан кә­сіпкерлерінің форумы» қа­уым­дастығы ұйымдастырған жо­ба шартына сәйкес кәсіпкер ана­лар бизнес-идеяларын өздері қорғап шығуы қажет. «Кәсіпкер-ана» әйелдер кәсіпкерлігін дамы­ту жөніндегі білім беру бағдар­ла­масы кәмелетке толмаған балалары бар және декреттік демалыста отырған аналарға арналған. Оларға өз бизнесін бастау арқылы отбасына қамқорлық көрсету мен кәсіби тұлғалық дамуды қатар алып жүруді міндет еткен жобаға 500-ден астам өтініш түскен. Өті­ніш берушілер тігін және тамақ өндірісі, ересектер мен бала­ларға қосымша білім беру сала­сын­да­ғы жобаларды жүзеге асыруды мақсат етеді.

Жоба ірі қалалардың тұр­ғындарына ғана емес, шалғай елді мекендерде тұратын аналарға да тегін оқудан өтуге мүмкіндік берді. Он төрт күн бойы қатысу­шылар өнімді құру және маркетинг негіздерін, қаржылық және салықтық сауаттылық барысын зерттеп, жеке бизнес-жоспар жасауды және аймақтың бизнес-сарапшыларынан жобаларды таныстыру дағдыларын үйренді. Ірімшік жасау, трикотаж киімдері мен әлеуметтік тақырыптарға под­касттарды өндіру, шағын кон­дитерлік дүкендер ашу, ағылшын тіліне оқытуға арналған сайт, шетелдіктерді орыс тіліне онлайн оқыту және тағы басқа болашағы бар бизнес-жобалар арасынан үздіктерін анықтау қазылар алқасы үшін қиынға соқты.

Бизнес-жобалар байқауында бірінші орынды мектеп жасына дейінгі және мүм­кіндігі шектеулі балаларға арналған фетр мен матадан жа­салған әдістемелік құралдарды өндіретін «Алақай» жобасының жетекшісі Айнұр Джерембаева иеленді. Ол осы идея­ны жүзеге асыруды көптен бері ойлап жүр­ген.  Дефектолог маман­ның айтуынша, мо­ториканы дамытуға және сөйлеу да­ғ­ды­ларын қалыптастыруға кө­мектесетін арнайы құралдардың ар­тықшылығы көп. Алайда дү­кендер мен интернет сайттардан ондай құралдарды табу қи­ын. Арнайы құралдар тапшы бол­ғандықтан, жоба авторы 1 жас­тан асқан балаларға көмектесетін өнімді өзі жасап шығаруды ойлас­тырады. Алдағы уақытта мұн­дай құралдар «Кәсіпкер-ана» жоба­сының нәтижесінде ба­лаларға қол­жетімді болмақ.

АЛМАТЫ