Экология, геология және табиғи ресурстар министрі Мағзұм Мырзағалиев Ресей Федерациясы Табиғи ресурстар және экология министрі Александр Козловпен кездесіп, өзен бойындағы гидрологиялық жылнамалармен алмасуды ұсынды.
«Жайық өзеніне қатысты қордаланған проблемалар су шаруашылығы саласындағы ынтымақтастығымыздың негізгі мәселелерінің бірі. Өзен суы тартылуының алдын алу және экожүйенің нашарлауы бассейннің су шаруашылығы жүйесін кешенді зерделеуді талап етеді. Осыған байланысты Жайыққа қатысты гидрологиялық жылнамалармен алмасу тәжірибесін тұрақты негізде енгізуді ұсынамын», деді М.Мырзағалиев.
1981 жылға дейін Жайық өзеніне байланысты бірыңғай гидрологиялық жылнамалық болса, 1982 жылдан бастап ҚазКСР мен РФКСР территориялары бойынша жеке-жеке гидрологиялық жылнама жүргізіліпті. Кеңес Одағы ыдырағаннан кейін әр мемлекет оны өз бетінше құрастыруға бел буды.
Тағы бір тетік ретінде ресейлік тараппен бірлесіп, өзен бассейніне таяу орналасқан кәсіпорындардың бірыңғай тізімін жасап, әр кәсіпорынның өзенге әсер ету деңгейіне талдау жүргізу ұсынылды.
«Жайық өзені бассейнінің экожүйесін сақтау мен қалпына келтірудің 2021-2024 жылдарға арналған бағдарламасы арқылы аталған бассейнге ластаушы заттарды төгетін кәсіпорындар анықталды. Олардың саны – 297. Бірыңғай реестр бүкіл өзен бассейні бойынша жағдайдың кешенді көрінісін жасауға мүмкіндік береді», деді еліміздің бас экологы.
Ведомство басшысының айтуынша, кәсіпорындарда айналмалы сумен жабдықтау жүйесін, суды тазартудың тиімді жүйесін, сондай-ақ ауыл шаруашылығында суды үнемдеу технологиясын енгізу маңызды бастама болады.