Руханият • 12 Сәуір, 2021

«Ғарышқа апарар жол»

46 рет көрсетілді

«Бөбек» ұлттық ғылыми-практикалық білім беру және сауықтыру орталығында  тікелей эфирде Білім және ғылым министрлігінің Мектепке дейінгі және орта білім беру комитетінің қолдауымен ғарыштық білім беру бо­йынша «Ғарышқа апарар жол» тақырыбында халықаралық форум өтті.

Білім және ғылым ми­нистрлігінің Мектепке де­йінгі және орта білім беру коми­тетінің төрайымы Май­ра Мелдебекова, «Бөбек» орталығының бас директоры Елена Сәкенова, «АҮДҰИ» КеАҚ президентінің міндетін атқарушы Ирина Калачева және «Бөбек» орта­лы­ғына қарасты обсер­вато­рияның директоры Райся Кудякова алғысөз сөйледі.

Қазақстан Республика­сы­ның ғарышкері, әскери-әуе күштерінің генерал-майоры, Халық Қаһарманы, «Қазақстан ғарыш сапары» Ұлттық компаниясы төрағасының орынбасары Айдын Айымбетов 60 жыл бұрын «Байқоңыр» космодромынан Юрий Гагарин «Восток-1» кемесімен ға­рыш­қа аттанғанын айтты. «Бұл еліміз үшін ерекше мереке болды. Яғни Юрий Гагарин алғаш рет ғарышқа қазақ жерінен ұшты. Ол жер шегінен шыққан тұңғыш адам болып, адамзат үшін жаңа кезеңді ашты. Бұл күн зор гуманистік маңызға толы», деді ол.

Ғарыштық қызметтің дамуы – Қазақстан үшін басекеге қабілеттілігі зор және еліміздің қарқынды индус­триа­ландырудың мық­­ты фак­торының бірі. Қазақстан-2030 жыл­ға ғарыштық қыз­мет көр­сетудің дү­ние­жүзілік нары­ғында өз қол­­даныс аясын ке­ңейтуі тиіс.

Елена Сәкенова рухани-адамгершілік білім беру бағдар­ламасының авторы Сара Назарбаеваның бастамасымен 2009 жылы «Бөбек» орталығында бірегей білім беру обсерваториясының ашыл­ғанын айтты. 2010 жылдан бас­тап соңғы 10 жыл ішінде «Бөбек» орталығының обсерваториясында 79 республикалық (6 708 қатысушы) және 50 ха­лықаралық (377 қатысушы) іс-шара өтті. 2 092 қатысушы республикалық шаралардың, 148 қатысушы халықаралық іс-шаралардың жүлдегері атанды.

Обсерваторияның «Бөбек» орталығының құрылымдық бөлімшесі болып, ғарыштық бағыт бойынша білім беру бағ­дарламаларын жүзеге асы­ратыны туралы Райся Кудя­кова мәлімдеді. Ол форумға қатысушыларды телескоп,­ компьютерлер, робот-техника сияқты заманауи құрылғы­лармен жабдықталған обсерватория қызметінің негізгі ба­ғыт­тарымен таныстырды. Сонымен қатар коман­да­лар құрамында ха­лық­ара­лық астрономиялық олим­­­пиа­даларға, турнир­лер­ге, бай­қаулар мен конфе­рен­ция­ларға қатысатын республика мектептерінің оқу­шылары обсерваторияда дайындықтан өтетіні айтылды.

Сондай-ақ осы жиында педогогика ғылымдарының докторы, Г.Гречко атындағы Нижегород планетарийінің директоры Г.Муромцева (Ресей), Астрономия және астрофизика бойынша ха­лықаралық олимпиаданың үйлестірушісі В.Загайнова (Канада), Тарас Шевченко атындағы Киев ұлттық универ­ситеті физика факультетінің инженері А.Симон  (Украина) және тағы басқа маман баян­дама жасады.

 

АЛМАТЫ

Соңғы жаңалықтар

Ұқсас жаңалықтар