Бұл туралы Сауда және интеграция министрлігінің баспасөз қызметі хабарлады. Жауапты ведомствоның Биржалық сауда басқармасының басшысы Мақсат Тұрсынбековтің айтуынша, заң жобасы негізгі үш бағытқа байланысты биржаларды дамытуды көздейді.
«Біріншіден, тауар биржаларының ашықтығына қойылатын талаптар күшейтіледі. Екіншіден, жағдайды өзгертуге және шын мәнінде бәсекелестік орта мен биржалық сауданы дамыту үшін жаңа жағдайлар жасауға айтарлықтай қадам жасалды. Үшіншіден, биржалық сауда көлемін ұлғайту міндеті қойылып отыр.
Егер де анықтап айтсақ, бірінші бағытқа сәйкес, жарғылық капиталды ұлғайту, биржалық сауданың бірыңғай қағидаларын бекіту, тауар биржаларының екі деңгейлі жүйесін енгізу, тауар биржалары мен биржалық саудаға қатысушылардың қаржылық тұрақтылығы бойынша талаптарды белгілеу көзделген», деді М.Тұрсынбеков.
Екінші бағыт аясында да бірқатар шара қарастырылыпты. Мысалы, биржалық брокерлер мен тауар дилерлеріне бірнеше тауар биржасына қатысуға тыйым салуды бір мезгілде алып тастап, бірыңғай аккредиттеу талабы белгіленеді. Сондай-ақ, азаматтарға делдалсыз бір рет келетін клиент ретінде биржалық сауда-саттыққа қатысуға мүмкіндік беретін тетікті енгізу қарастырылып отыр. Тауарлар мен сауда-саттықты секциялар бойынша бөлу ескеріледі. Бұдан басқа, уәкілетті органға бір сауда сессиясында лоттың ең жоғары мөлшерін белгілеу бойынша өкілеттіктер беріледі.
«Үшінші бағыт – іске асырылған мәмілелер көлемі мен секция түріне байланысты сараланған мөлшерлемені орнатуға мүмкіндік беріп, биржада келісімдерді жасау мен шарттарды орындауға қатысты сақтандыру құралы енгізіледі», деді Биржалық сауда басқармасының басшысы.
Заңнамаға осы толықтыруларды енгізу арқылы биржа саудасының көлемі артып, оның ашықтығы қамтамасыз етіледі деген сенімде заң жобасының авторлары. «Маңызды артықшылықтардың бірі – нарықтың талабына сай бағалар белгіленіп, жаңа әріптестерді тартуға мүмкіндік беріледі. Бұл өз кезегінде бәсекелестіктің артуына әсер етеді. Тұрақты биржалық саланы қалыптастырудағы тағы бір маңызды мәселе – биржалық келісімшарттардың ашықтығы. Заң жобасында бұл да ескерілген», деді М.Тұрсынбеков.
Биыл ақпанда аталған заң жобасы Үкімет басшысының Кеңсесіне енгізілді. Енді реформалық құжат Парламенттің қос палатасында қаралатын күн де алыс емес.
