Қоғам • 22 Сәуір, 2021

Белгісіз дерттің беті қайтқан жоқ

10 рет көрсетілді

Қазақстанның 10 өңірі «қызыл аймақта» тұр. Бұл туралы Денсаулық сақтау вице-министрі – Бас мемлекеттік санитар дәрігер Ерлан Қиясов айтты.

«Бүгінгі күні әлемде КВИ-дің 141 миллионнан астам жағдайы тіркелген. Тәулігіне 700 мыңнан астам жағдай тіркеліп жатыр. 3 миллионнан астам адам қайтыс болды. Өлім көрсеткіші 2,1 пайызды құрап отыр. ДДҰ-ның алты аймағының бесеуінде аурудың өсу тенденциясы байқалады. 21 сәуірдегі жағдай бойынша Қазақстанда COVID-19 оң нәтижесімен 294 946 науқас және КВИ-дің теріс нәтижесімен 52 025 жағдай тіркелді. КВИ-дің оң нәтижесімен ауырған 252 598 науқас және КВИ-дің теріс нәтижесімен ауырған 50 839 науқас емделді», деді вице-министр.

Оның атап өтуінше, эпиде­мия­лық жағдай матрицасына сәйкес еліміз 23 күн бойы тәуекелдің жоғары аймағында, яғни «қызыл аймақта» тұр. 

«Сондай-ақ тәуекелі жоғары аймақта 10 өңір бар. Олар: Нұр-Сұлтан, Алматы және Шымкент қалалары, Атырау, Батыс Қазақстан, Ақмола, Қара­ған­ды, Ақтөбе, Маңғыстау және Қызылорда облыстары. Бүгінгі күні тәуекелдің орта­ша аймағында 4 өңір, атап айт­қанда Жамбыл, Шығыс Қазақстан, Павлодар, Алматы об­­лыстары бар. «Жасыл ай­мақ­та» Түркістан, Солтүстік Қазақстан және Қостанай облыстары ор­налас­қан», деді Е.Қиясов.

Коронавируспен сыр­қат­­тану­­шы­лықтың 58 пайызы 3 өңірге тиесілі. «Нау­рыз айымен салыстырғанда сәуір айында сырқаттанушылықтың өсуі Ақ­мола, Қостанай, Павлодар және Сол­түстік Қазақстан облыстарын қос­пағанда, барлық өңірде байқала­ды. Бұл ретте ел бойынша сырқатта­нушы­лықтың 58 пайызы 3 өңірге, атап айт­қанда Нұр-Сұлтан және Алматы қа­лалары мен Алматы облысына тие­сілі», деді вице-министр. Оның атап өтуінше, қалыптасқан жағдайды ескере оты­рып, барлық өңірде әлеуметтік-эконо­микалық ны­сан­­дардың жұмысын шектеу өлшем шарттарына сәйкес қо­сымша шектеу шаралары қа­был­дануда.

Жиын барысында вице-министр елі­міз­де вак­ци­на­ның бірінші ком­по­нен­ті 766 614 азаматқа са­лын­­­­ғ­ан­ын тілге тиек етті.

«Бүгінгі күні бірінші компонентпен 766 614 азамат, екінші компонентпен 126 500 азамат егілді. Қажеттілікті ескере отырып, егу пункттерінің саны тұрақты түрде өсіп келе жатқанын атап айтқым келеді. Бүгінгі күні өңірлерде 1 051 егу пунктінде иммундау жүргізілуде. Бұдан басқа, шал­ғайдағы аудандарда, ұйым­дас­қан ұжымдарда, адамдар көп жиналатын жерлерде КВИ-ге қарсы вакцинация жүргізу үшін 303 көшпелі егу бригадасы жұмылдырылды», деді Е.Қиясов

Оның дерегінше, иммундау науқа­нына 10 мыңнан астам медицина қыз­меткері тартылды.

«Ауыл тұрғындары үшін вакци­на­цияның қолжетімділігін арттыру мақ­сатында вакцинация жылжымалы меди­циналық кешендерді пайдалана отырып ұйымдастырылады», деді вице-министр.

Бизнес қоғамдастықтың бас­тамасымен 2021 жылдың қаң­тарынан бас­тап Нұр-Сұлтан, Алматы, Қарағанды қала­ла­рында Ashyq мобильдік қо­сым­­шасын енгізу бойынша жобаны жүзеге асыру басталды.

«Аталған жобаны кеңейту мақсат­ында, Бас мемлекеттік санитар дәрі­гердің қаулысына сәйкес, оған Ақтөбе, Көкшетау, Тараз және Талдықорған қала­лары қосылды. Осы жыл­дың 21 сәуіріндегі жағдайға сәйкес, бағдарлама фитнес-клубтарда, СПА-салондарда, сауналарда, бассейндерде, боулингтерде, бильярд залдарында, компьютерлік клубтарда, концерт залдарында, қоғам­дық тамақтану орындарында жұмыс істеп тұр», деді вице-министр. Оның сөзінше, аталған жоба облысаралық және қалааралық тұрақты емес туристік тасымалдауға да енгізі­ліп жатыр.

«5 мамырдан бастап жобаға «жасыл аймақтағы» банкет залдары, сонымен қатар карао­ке-клубтар қосылатын болады. 26 сәуірден Ashyq жобасын республиканың барлық өңірінде тарату жоспарланып отыр. Ashyq жобасына
Info-Kazakhstan сайты арқылы өтінім берген және қызмет түріне сәйкес QR-код алған, сонымен қатар әкімдіктердің сайтына орналастырылған, 7 күндік оқудан өткен бизнес өкілдері қатыса алады», деді Е.Қиясов.

Соңғы жаңалықтар

Алматы қаласында жер сілкінді

Аймақтар • Бүгін, 17:39

Мереке қарсаңында марапатталды

Аймақтар • Бүгін, 13:58

Ұқсас жаңалықтар