«Қазгидромет» РММ агрометеорологиялық мониторинг және болжау департаментінің директоры Нонна Лоенконың айтуынша, көктемгі егу жұмыстарының алдында бірқатар өңірде өнімдік ылғал қоры жеткілікті болады деп күтілуде.
«Атап айтқанда, Ақмола облысының Астрахан, Атбасар, Егіндікөл, Зеренді, Целиноград аудандарында, Қостанай облысының Бейімбет Майлин, Сарыкөл, Қостанай аудандарында, Солтүстік Қазақстан облысының Шал ақын ауданы мен Жұмабаев, Тимирязев, Жамбыл аудандарының кей жерлерінде, Қарағанды облысының Бұқар жырау, Нұра аудандарының кейбір тұстарында, Шығыс Қазақстан облысының Глубокое және Алтай аудандарында топырақтың ылғалдығы қанағаттанарлық деңгейде», деді спикер.
Оның сөзінше, осы және өзге де мәліметтер биыл қазанда кәсіпорын дайындап іске қосқан «AgroData» веб-қосымшасына орналастырылған.
«Экология министрінің тапсырмасымен біз фермерлерге арналған веб-қосымшаны әзірледік. Қазір оның мобильді нұсқасын жасап жатырмыз. Дегенмен қазірдің өзінде браузер арқылы ұялы телефонмен қосымшадағы ақпаратты алуға болады. Бұл жерде Қазгдирометтің тек ауа райын болжаумен айналыспайтынын атап өтуіміз керек. Мұнда халықтың қауіпсіздігін, оның ішінде азық-түлік қауіпсіздігін қамтамасыз етуге бағытталған өнімдердің толық спектрі дайындалады», деп атап өтті Нонна Лоенко.
Департамент директоры «AgroData» жүйесіндегі ақпараттың көбі бұрын да болғанын, бірақ олардың әртүрлі платформаларда орналасқанын айтады. Ал жаңа қосымша фермерлерге қажетті барлық ақпаратты бір жерден алуға мүмкіндік туғызып отыр.
«Бұл мәліметтерге қолжетімділікті жеңілдетіп, оны тиімдірек қолдануға мүмкіндік береді. Қосымшаны неғұрлым түсінікті, қолдануға жеңіл етіп жасауға тырыстық. Қазгидромет әзірлей алатын фермерге қажетті ақпаратты белгілі бір шаруашылыққа бейімделген есепке жүгінбей-ақ мобильді қосымшадан көруге болады. Бұған 3 сағат жаңарып отыратын ауа райы, синоптикалық және агрометеорологиялық болжамдар мен нақты деректер кіреді», дейді Нонна Лоенко.
Бұдан бөлек, суару маусымында мемлекеттік бақылау желілерінің пункттері бойынша белсенді және тиімді температуралардың өлшемі мен топырақ ылғалдылығының қоры, ал күн суық кезде қардың биіктігі, тоңның тереңдігі бойынша ақпарат беріледі.
«AgroData»-да сонымен қатар бұрын болмаған әр он күндікке арналған нақты мәліметтер де бар. Осылайша, алынған ақпарат бойынша агротехнологияларды уақтылы және тиімді қолдану егін науқанын дұрыс жоспарлауға, өсімдіктердің солып қалуының алдын алуға мүмкіндік береді.
«Ылғал қоры туралы мәлімет көктемгі егін науқанында тиімді егіс нормасын анықтауда, тұқымды тастайтын тереңдікті таңдауда, тыңайтқыш қолдануда үлкен рөл атқарады. Мұның барлығы өнімнің көлеміне әсерін тигізеді», дейді ол.
