Көзі тірісінде Ж.Кенжалин Әл-Фараби атындағы ҚазҰУ-да PR, БАҚ менеджменті мен маркетингіне байланысты бірнеше халықаралық ғылыми-тәжірибелік конференцияларды өткізіп, жиі-жиі тәжірибесімен бөлісіп тұрды. Оның «Саяси менеджмент және баспасөздің жұртшылықпен байланыс мәселелері» атты оқу құралы, ақпараттық менеджмент пен маркетинг салаларына байланысты зерттеу мақалалары бүгінде журналистика факультеті студенттерінің игілігіне қызмет етуде. Ж.Кенжалин атындағы «Баспасөз және жаңа медиа» оқу-шығармашылық зертханасы да болашақ мамандарды ұлағатты ұстаздың адалдығы мен кісілік болмысына сай тәрбиелеу мақсатында ашылған болатын.
Конференцияның шымылдығын ҚазҰУ Әлеуметтік даму жөніндегі проректордың міндетін атқарушы Әлия Мәсәлімова ашып, бұқаралық ақпарат құралдарының еліміздің әлеуметтік-экономикалық, мәдени дамуындағы орасан зор рөліне тоқталды. Сондай-ақ Президенттің көптеген мәселеге қозғау салып, қалың ел тарапынан қолдау тапқан «Халық үніне құлақ асатын мемлекет» атты тұжырымдамасы журналистердің алдына зор міндеттер жүктеп отырғандығын, қазақ қаламгерлерінің қара шаңырағы – Қазақ ұлттық университеті де осы міндеттер үдесінен шығуды мақсат тұтатындығын баса айтып, «Ақпараттық менджмент сынды жаңа ғылыми бағыттың негізін қалап, шәкірт тәрбиелеген мұндай тұлғаны кейінгі жастарға өнеге ете отырып, болашақ мамандарды тәрбиелеу – біздің басты парызымыз», деп сөзін қорытындылады.
Жиын барысында журналистика факультетінің деканы Сағатбек Медеубек Мемлекеттік хатшы Қырымбек Көшербаевтың, Ақпарат және қоғамдық даму министрі Аида Балаеваның құттықтау-лебіздерімен таныстырды.
Одан кейін қабырғалы қаламгердің қысқа ғұмырында қалдырған мол мұрасы мен атқарған орасан істері туралы көркем фильм көрсетілді.
Әсерлі кешті әрі қарай Парламент Мәжілісінің депутаты Сауытбек Абдрахманов жалғады.
«Тамыры терең оқу орны Әл-Фараби атындағы Қазақ ұлттық университеті болар елдің баласына жарасатын мінез – асылдарды ардақтау дәстүрін берік ұстанып отыр» дей келе, ғалымның тазалық, тәрбиелілік, кішілік, кісілік ұстанымдарына адал болу арқылы өз бойындағы қасиеттерін үлгі еткендігін мақтанышпен жеткізді. Ал «Тұлға» журналының» бас редакторы Марат Тоқашбаев өз сөзін «Бұл шара ұлттық мәдениетіміз бен журналистикамыздың ақылдасатын алаңына айналады. Жүкеңнің бүкіл шығармашылық өмірі менің көз алдымда өтті. Адами қасиеттерінен үлгі алуға тырыстық. 2018 жылы Жұмабек Омарұлының құрметіне және оны еске алу мақсатында жарық көрген «Серке сөздің сардары» кітабындағы ақтарылып жазылған пікірлер арқылы Жүкеңнің өзге де қырларын таныдым», деп түйіндеді.
Әрі қарай әріптес-достары Жұмабек Кенжалиннің өмірі мен шығармашылығы, қоғамдық қызметі туралы тебіреніске толы естеліктерімен бөлісті. Оның адами болмысын, ел алдында жүрген көшбасшылық қасиетін, ерекше қабілетін, еңбекқорлығын, азаматтық тұлғасын айқара ашты.
Айта кетейік, Жұмабек Кенжалин оқуларын ұйымдастырудағы басты мақсаты: таным сабақтастығын жалғастырып, аяулы азаматтың сәулелі ғұмыры арқылы ұрпақ бойына үлгі-өнеге сіңіру, тарихи тұлға ретінде дәріптеу. Болашақта бұл жиын дәстүрлі түрде жалғасын табады.
