Аймақтар • 05 Мамыр, 2021

Ауладағы жүк көлігін ұрлап кеткен қылмыскер ұсталды

203 рет
көрсетілді
1 мин
оқу үшін

Ақмола полицейлері жүк көлігін айдап әкеткен 25 жастағы ақмолалықты қууға мәжбүр болды, деп хабарлайды Egemen.kz

Ауладағы жүк көлігін ұрлап кеткен қылмыскер ұсталды

Ведомство өкілдерінің хабарлауынша, 3 мамыр күні таңертең Көкшетау қаласы полиция басқармасының кезекші бөліміне Краснояр ауылының тұрғыны жүк көлігін белгісіз біреудің айдап әкеткенін айтып көмек сұраған. Көлік иесіне келтірілген шығын көлемі 500 000 теңге шамасында.

«Полиция қызметкерлері қылмыстың түнде жасалғанын анықтады. Күдікті үйдің жанында тұрған «ЗИЛ» маркалы автокөлігін айдап әкеткен. Патрульдік полиция және жергілікті атқару органдарының қызметкерлері жедел іздестіру шарасы барысында бейнебақылау камерасы арқылы көлікті анықтады», деді ведомстводан.

Бірнеше сағаттан кейін «Әскер-1» патрульдік полициясы экипажының қызметкерлері лейтенант Дархан Бопиев пен лейтенант Олжас Тілеуов «Рузаевка – Көкшетау» автожолының 3 шақырымында ұрланған көлікті тоқтатты. Көлік ішінде 25 жастағы азаматтан бөлек, оның анасы болған.

«Қазіргі кезде осы жағдайға байланысты Қылмыстық кодекстің 200-бабының 1-бөлігі «Автомобильді заңсыз иелену» бойынша сотқа дейінгі тергеу басталды. Сондай-ақ мас күйінде көлік құралын жүргізгені және полиция қызметкерінің талаптарын орындамағаны үшін әкімшілік хаттамалар толтырылды», деп мәлімдеді ведомство өкілдері.