05 Мамыр, 2021

«Қағаз үйдің» құпиясы

1365 рет
көрсетілді
5 мин
оқу үшін

Екі жыл бұрын жарыққа шыққан «Қағаз үй» (Money Heist) испан телесериалының алғашқы шығарылымы көрермен жүрегін лезде жаулап алды. Асыра айтқандығымыз емес, расы солай. Батыл да қызуқанды мінезімен танылған сериал кейіпкерлерінің бейнесі билік озбырлығы мен капиталистік құрылғыға қарсы тұрудың жаппай мәдени символына айналды. Сериалдың мамыр айында шығатын жаңа маусымын тағатсыздана күтіп отырғандар көп. Осынау фильмнің сәтсіздігі мен сәттілігінің құпиясы қандай?

«Қағаз үйдің» құпиясы

Фильм жазушы, продюсер Алекс Пиннің қылмыскерлер тобы туралы драмасының желісі бойынша түсірілді. Испания қаржы сарайын тонауға ше­шім қабылдаған Профессор атанған көшбасшы майдан қыл суырғандай барлы­ғын ой елегінен өткізе отырып, тонауға ебі бар, есебі түгел мамандарды өз тобына жинай бастайды. Сырт көзге көп, сөзге сараң, ұяң көрінетін момын жігіт полицияның аттап басқан қадамына жоспар құра білді. Суық ақыл мен сергек сана қашанда оның басты қаруы болатын. Қан төгуді мұрат тұтпаған, тек керегін ғана алуды мақсат еткен ол майдан даласында өзін бір сәтте жоғалтып алған емес. Мұны суға салса батпайтын, отқа салса жанбайтын әлдебір ертегі кейіпкерімен шатастырмаған жөн. Мұнда барлығы шынайы. Кө­рер­менді жіпсіз байлап қойған сю­жеттік шиеленістер мен тосын шешімдер кейіпкерлер тағдырына еріксіз иландырған еді.

Әне-міне дегенше жаңа маусымы шығып қалады деп күтіп отырған сериал тұсакесері әуелде Испанияда өтті. 2017 жылы ал­ғаш­қы сериясын 4 миллионнан астам адам тамашалады, бі­рақ әр сериясы шыққан сайын қа­ралым саны төмендей берді. Теле­шоу ұжымы фильмді әрмен қа­рай түсіру, түсірмеу керектігін білмей әрі-сәрі күйде отырған-ды. «Менің әлеуметтік желіде аздаған оқырманым бар еді. Аздаған сағаттарда-ақ жазылушылардың саны күрт артып, 8-9 миллион оқырманға жетті. Мұндай та­ны­малдықты ешкім күтпеген еді. Бәріміз бір-бірімізге қарап «бір­деңе болып жатыр» деп таң­ғалдық», дейді сериалға түскен актерлердің бірі Альба Флорес. Иә, расымен де үлкен жарылыс болған еді. Өйткені Сальвадор Далидың маскасымен бет-жүзін жасырып, қызыл комбинезон киген қарақшылар туралы әңгіме ойламаған жерден Netflix назарына ілігіп қалады. «Сәттілік сәтсіздіктің арғы бетінде» деген осы болар, осыдан соң-ақ сериал түсірушілердің бағы жанып, әп-сәтте әлемге танылып шыға кел­ген еді. Арна шоу құқығын ал­ғаннан кейін, Casa de Papel атты түп нұс­қа атауын Money Heist деп өзгер­тіп, эпизодтардың ұзақ­тығын 70 минуттан 45 ми­нутқа дейін қыс­қартып, сериал санын арттырды.

Фильмдегі революциялық қоз­ғалыс Екінші дүниежүзілік соғыс кезінде италиялық пар­ти­зандардың антифашистік ән­ұраны болған Bella Ciao әнімен көмкерілген. 2018 жылдың жа­зындағы осынау шоудың арқа­сында жеңіс әні қайтадан жер-жерде шырқалып жатты. Сериал шыққаннан кейін қызыл комбинезон мен Дали маскалары кеш­терде ғана танымал болып қоймай, ұрлыққа түскен кә­дімгі тонаушылар да кие бас­тады. Осыдан соң қауіпсіздік мақ­сатында карнавал кезінде мұн­дай костюмдерді киюге тыйым салған жағдайлар да кездесті. Испанияның El Mundo газеті өз ке­зегінде шоудың адамдарға мұндай әсерін «қарақшылар идеалды антигерой болып көрінетін жаһандық көңілсіздік көрінісі» деп сипаттаса, түрік баспасөзі терроризмді қолдауға шақыратын символдық көрініс деп шоуға тыйым салуға шақырды. Осы­лайша, фильм тарихтағы үздік сериал­дардың қатарына еніп, көп­теген марапатқа ие болды. 2018 жылы беделді Emmy Awards сыйлығының үздік драмасы атағын алды. Сол жылы New York Times газетінің нұсқасы бо­йын­ша үздік телехикаялар тізіміне енді. Тағы бір айта кетерлігі, фильм­де Қазақстан атауы бірді-екілі жерде аталатын тұстары бар. Ке­йіпкердің бірі «Біздің ақшамен Қазақстаннан да спутник сатып алуға болады», дейді. Әрине, мұнымен сценарий авторларының нақты не айтқысы келгені бей­мәлім, десе де оқ пен оттың ор­та­сындағы майдан даласынан Қазақ­стан атын естіп елеңдеп қалға­нымыз рас. Ал ең бастысы халық сүйіспеншілігіне алғаусыз бөленген сериалдың жаңа маусымын жанкүйерлер армиясы тағатсыздана күтіп отыр!