Осыдан 6 жыл бұрын «Жобаларды басқару» тренингінен өткен Алматы қаласының тұрғыны Расима Темербаева тегін асхана ашу бастамасын қолға алған болатын. Алға қойған мақсатының қиындығына мойымастан іскер әйел әжесі мен анасының қайырымдылық жасау туралы қағидаларын қаперде ұстайтынын айтады.
«Үйде анам мен ұлым және де жақындарым маған жігер беріп отырады. Дегенмен бар уақытым мен күш-жігерімді қайырымдылық істерге арнап жүргенімді түсінбейтіндер де кездеседі. Мен әрдайым көпбалалы отбасылардың балаларына, зейнеткерлерге және мүгедектігі бар адамдарға көмектескім келіп тұрады», дейді іскер жан.
Расиманың әлеуметтік жобаны жүзеге асыруға деген ойы осыдан 20 жыл бұрын шамасында туған. Психолог, қаржыгер мамандығы бола тұра, алдына осындай мақсат қойған қайырымды жан жобаны іске асырудың әліппесін зерттей бастайды.
«Мен АҚШ-та азық-түлік банкі бар екені жайында оқып білгеннен кейін осы жобаны қолға алуға қызығушылығым туды. Бұл жоба азық-түлік жинап, оларды мұқтаж адамдарға үлестіру сияқты қайырымдылықты көздейді. Жобаны зерттеп болғаннан кейін алған бағытымды анықтағандай болдым. Дегенмен жоба тұжырымдамасына сәйкес азық-түлік банкі толыққанды болуы керек. Алайда көп мөлшерде азық-түлік үлестіре алмағанымызбен де, алдағы уақытта бұл мақсатымызға жетеміз деп ойлаймын», дейді кәсіпкер.
Жоба тегін тамақ үлестірумен ғана шектелмейді. Оның әлеуметтік сипаты басым. Өйткені қоғамда қамқорлыққа, мейірімге мұқтаж қарт адамдарға көңіл бөлу жағы жетіңкіремейді. Асханаға келетіндердің арасында бұрын ұстаз болып еңбек еткендер, дәрігерлер мен ғылыми қызметкерлер де бар. Расиманың айтуынша, олар үшін серуендеп қайтатын, көңілді орта әрдайым қажет. Келушілердің алды 80 жаста. Қарт адамдарға ас әзірлеп ішу қиынға соғатындықтан, асханадағы ыстық әрі буға бұқтырылған жеңіл тамақтар – зейнеткерлер үшін таптырмайтын ас мәзірі. Өйткені олардың арасында қант диабеті, созылмалы аурулары бар жандар баршылық. Мұнда ас мәзірі күн сайын өзгеріп отырады. Көпшілікке тарыдан жасалған тағамдар, борщ, бұршақ сорпасы ұнайды.
«Диеталық тағам қарттарға ғана емес, көпшіліктің денсаулығына да пайдалы. Түскі ас кезінде қарт адамдар бір-бірімен тіл табысып, осы маңға ортақ әңгіме дүкен құруға келеді. Жалғыз қалудан жалығатын жандар жастық шақтарын, жұмыс істеген жылдарын, отбасындағы қызықтармен бөлісіп, бір мезгіл көңіл көтеріп, сергіп қайтады. Біздің жобамыз осылайша жалғызілікті жандардың қоғамға қажет екенін, жасы үлкен болса да қандай да бір қоғамдық іске жарамды екенін сезінуге қолдау көрсетуді мақсат етеді. Қарт адамдардың мерейі үстем болса, қоғамда да ізгілікті орта қалыптасады. Мен өз жобамның қолдау тауып, қоғамға пайдасы тиіп жатқанына қуанамын», дейді Р.Темербаева.
Осындай игі ісімен көпшіліктің алғысына бөленіп жүрген кейіпкеріміз 2015 жылы «Ең үздік ерікті» аталса, 2017 жылы «Алтын жүрек» сыйлығын иеленген. 2018 жылы «Қазақстанның үздік әлеуметтік жобалары» республикалық байқауында 1-орын, 2019 жылы «Қайырымдылық керуені» байқауында да 1-орынды иеленген. Ал былтыр «Халық алғысы» медаліне лайықты деп танылды.
Қиыншылығы мен қуанышы қатар өрілген осынау игі істе Расимаға достары, жанашыр азаматтар мен алматылық бизнесмендер көмектесуде. Осы уақыт ішінде жоба қайырымдылыққа бейжай қарамайтын азаматтардың есебінен іске асып келеді. Асүйде бір кездері жобаға ерікті ретінде қатысқандар жұмыс істейді. Кәсіби аспаздар болмағанымен, салаға қатысты біліктіліктерін арттырып отырады. Олардың еңбекақысы Алматы қаласының жұмыспен қамту аясында төленеді.
«Біз қандай да қиындықтар болсын жобаны тоқтатып алмау үшін тырысып келеміз. Дегенмен ең қиын сәттер артта қалды. Осыдан төрт жылдай бұрын қаражаттың жоқтығынан жобаны бір жарым айға тоқтатуға тура келді. Осындай сәтте достарымыз бен жақындарымыз қолдау көрсетіп, мен дайындаған жартылай фабрикаттарды сатып алды. Сол кезде де қариялар жағы сенім артып, жұмыстың қайта жанданатындығына қолдау білдірген болатын. Ақпарат құралдары да мәселе көтеріп, нәтижесінде демеуші де табылды, жұмысымыз да алға басты. Сатудан түскен қаражаттың да пайдасы зор болды», дейді Расима.
Оның айтуынша, қоғамдағы кез келген игі іс демеушілердің арқасында жүзеге асады әрі бірлескен күш-жігер қажет. Оған дәлел ретінде пандемияға байланысты төтенше жағдай кезінде Расиманың асүйі жедел жәрдем станса дәрігерлеріне де қолдау көрсетіп, тегін тамақтандырғанын айта кеткен абзал. Бұл игі шараға Алматы мен Нұр-Сұлтандағы 20 дәмхана мен мейрамхана қосылды. Осы уақытта 20 мыңнан астам түскі ас берілді. Ауқат артылып қалған жағдайда басқа да қайырымдылық қорларына азық-түлікпен көмектесіп, көпбалалы отбасыларға, жалғызбасты адамдарға да қолдау көрсетілді. Осылайша, бірлескен күш-жігердің арқасында көптеген қиындық артта қалды.
Қоғамдағы мұқтаж, қамкөңіл жандарға жақсылық жасауды мақсат еткен Расиманың асүйі қандай да болсын қиындықтарға қарамастан, әрдайым қуанышқа толы. Ал жанарларынан жылылық сезілетін жандардың Расима мен осы асхана қызметкерлеріне алғыстан басқа айтары жоқ.
АЛМАТЫ
