Театр • 18 Мамыр, 2021

Күлше қыз

62 рет көрсетілді

Музыкалық жас көрермен театры көрермен назарына жаңа премьераны тарту етті. Демалыс күндері теат­р сахнасында Евгений Щварцтың «Күлше қыз» атты музыкалық ертегісінің премьерасы өтті.

«Күлше қыз» музыкалық ертегісі орыс драматургы Ев­гений Щварц пен композитор Антонио Спадавеккианың «Золушка» атты ертегісінің желісінен алынған. Шығарманы қазақ тіліне аударған – Есім Сегізбаев. Аталған ерте­гі­нің қоюшы режиссері «Сах­нагер-2019» Ұлттық театр сыйлығының иегері, Музы­калық жас көрермен театрының актері әрі режиссері Расул Усманов. Музыкамен әрлеген халықаралық конкурстардың лауреаты Руслан Баймурзин, қоюшы хореограф Уәлитбек Сиязбеков және қоюшы сурет­ші Әнуар Сәпиев.

«Бүгінгі премьера әлемге танымал «Күлше қыз» ертегісі. Біздің ертегіміз жай ғана ертегі емес – музы­ка­лық ертегі. Ал сіздер сабақ­та­рыңызды ой­дағыдай аяқтап, каникулға, жақсы демалысқа шығатын күнге жетейік. Ка­никулда біз сіздерге тағы да керемет ерте­гілерді дайындайтын боламыз!» деген театр директоры, Қазақстанның еңбек сіңірген қай­раткері Асхат Маемиров кіш­кентай көрер­мендерді жаңа премье­раның ашылуымен құттықтады.

Музыкалық жас көрермен театры «Күлше қыз» музыкалық ертегісі арқылы өнер жолына қызығушылықпен қарайтын дарынды жасөспірімдер мен балалардың қиялын қозғап, оларды өнерге қызықтырып, қанаттандырды.

«Театр репертуарында алғаш рет балаларға арналған орыс тіліндегі қойылым сахналанып отыр. Біз осы ертегіде басқа театрлардан өзгешелеу етіп жасадық. Қойылымда параллельді ешкімге кедергісін тигізбейтін екі – Ертегішілер деген кейіпкерлерді қостық. Олар спектакльдің басынан соңына дейін жүріп, автор ретінде үлкен рөлді жүргізеді. Сонымен қатар сахнадағы әртістер көрермен балаларды ертегі әлеміне алып кету үшін балалармен қарым-қатынас жасап отырады. Сондықтан да менің ойымша интерактивті туынды деп ойлаймын. Алдағы уақытта ағылшын тілінде сахналау жоспарымызда бар. Біз қойылымға екі ай уақыт дайындалдық. Әртістер керемет ойнап шықты. Режиссер ретінде әртістердің ойынына, сахнаның безендірілуіне ризамын!», деді қойылымның режиссері Расул Усманов.

«Күлше қыз» ертегісі – театр­сүйер көпшілікке бұрыннан таныс әйгілі ертегі. Ондағы айтылатын ой мен өтетін оқиға жас көрерменнің көңілін елітіп, қиялына қанат бітіретіні сөзсіз. Анасынан ерте айырылған Күл­ше қыздың өмірі бірде аянышты болса, енді бірде ғажайып оқиғалармен алмасып отырады. Оның өгей шешесі мен одан туған екі әпкесі әртүрлі қисынсыз әрекеттерімен Күлше қызды тек үй жұмыстарына салып қойғысы келеді. Алайда бақ та, бақыт та маңдайыңа жазылған болса, оған кедергі болатын күш-қайрат жоқ. «Күлше қыз» ертегісі осындай ойлардың, ақ пен қараның, шындық пен қиянаттың ара­сындағы қақтығыстарды суреттеп, көрерменді тағдырдың тылсым жолдарында өтетін таң­ғажайып оқиғаларға қарай жетелейді. Ертегінің тәрбиелік мәні – кез келген адам алдынан кездескен қиындықтарға шыдап, мойымаса, ақыры бір жақсылыққа кез болады.

Соңғы жаңалықтар

Ұқсас жаңалықтар