Қазіргі кезде Жамбыл облысында жүзден астам өзен және Ақкөл, Билікөл көлдері мен Балқаш көлінің бір бөлігі орналасқан. Сондай-ақ ірі Тасөткел, Теріс-Ащыбұлақ, Ынталы, Қарақоңыз, Қақпатас су қоймалары мен 112 тоған тағы бар. Аталған су арналарының бәрі де өңірдің әрбір ауданы мен ауылдарына жақын. Ал қай кезде де тілсіз жаудың түбі тұңғиық, тереңі құрдым екені белгілі. Бірақ демалыс үшін, көңіл көтеру мақсатында, сергу әдетімен суға түсудің соңы көп жағдайда адам өліміне әкеліп соғып жатады. Мәселен, өткен жылы суға кету оқиғасы Байзақ ауданында көп тіркелген. Ең өкініштісі, суға бату бойынша аталған ауданда бақилық болғандардың көбі балалар екен. Байзақ ауданында өткен жылы 3 адам суға кету салдарынан қайтыс болса, оның ішінде 2 бала бар. Мұндай жағдай Тараз қаласы мен Шу, Жамбыл, Мойынқұм, Жуалы, Меркі, Т.Рысқұлов және Сарысу аудандарында да орын алған. Аталған аудандарда да екіден-үштен балалар суға кетіп, қаза болған. Тек Қордай және Талас аудандарында мұндай оқыс оқиға тіркелмеген. «Өткен жылы облыстың су айдындарында 16 суға бату оқиғасы болып, соның салдарынан 17 адам көз жұмған. Оның ішінде 9 бала бар. Осы орайда өткен жылы тиісті жұмыстар атқарылып, нәтижесінде суға кету 6 оқиғаға, қайтыс болған адамдар саны 8-ге төмендеді. Ал қаза болған балалар саны төртеуге кеміді», дейді облыстық Төтенше жағдайлар департаменті азаматтық қорғаныс басқармасының бастығы Руслан Шариев. Мұндай қайғылы оқиғаның алдын алу әуелі әрбір адамның өзіне байланысты. Қауіпсіздік шараларын барынша сақтап суға түсуге рұқсат етілген. Дейтұрғанмен, бұл мақсатта тиісті сала өкілдері жұмыстар жүргізіліп жатқанын айтады. Нәтижесінде, жыл басталғалы бері төрт ай ішінде облыстағы су айдындарында төтенше жағдай тіркелмепті. Бұған бір жағынан өңірде қабылданған карантин талаптары да әсер еткен. Бүгінде төтеншеліктердің жазғы маусымға жабдықтары дайын екен. Су қаупінің алдын алуға 17 техника, 12 жүзу құралы ұйымдастырылыпты. Бұдан бөлек, 27 бірлік құтқару жабдығы дайындалыпты.
Тілсіз жаудың тағы бір түрі – өрт. Бұл да көктемнің соңын ала, жаз мезгілі жақындағанда тұтануы ықтимал қауіптің бірі. Осыдан бірер жыл бұрын Шу және Мойынқұм даласындағы «Қосқұдық» орман маңынан шыққан өрттің талай алқапты алып кеткені ел есінен шыға қойған жоқ. Бүгінде өңірде өрттің алдын алу жұмыстары қандай деңгейде жүргізілуде? Апаттың айтып келмейтінін ескерсек, бұған да тастүйін дайындық қажет болып тұр. Бұл орайда облыстық Төтенше жағдайлар департаменті мемлекеттік өрт бақылау басқармасының бастығы Мақсат Әкімбаев облыс аумағының ғарыштық мониторингін жүргізуге өткен жылы облыс бюджетінен 5 миллион 200 мың теңге бөлінгенін айтты. Бұл бастама осы жылы да жалғасын табады. «Биыл үш рет облыстың жалпы көлемі 3,048 миллион гектар болатын мемлекеттік орман қоры аумағын «Қазавиаорманқорғау» республикалық мекемесінің авиатехникасымен ұшу арқылы әуеден күзету жүргізілетін болады. «Қазавиақұтқару» акционерлік қоғамының авиатехникасымен өңірдегі өртке қауіпті учаскелерді аралап шығу, олардың өртке қарсы жағдайына мониторинг жүргізу үшін облыс әкімдігі арқылы ағымдағы жылы 47 миллион 500 мың теңге бөлініп, 48 ұшу сағаты белгіленді. Сондай-ақ мемлекеттік орман қорының материалдық-техникалық базасын жақсарту үшін 217 миллион теңге бөлінді», дейді ол.
Талай адамның өмірін қиған тілсіз жау қай кезде де тұтқиылдан тап беруі мүмкін. Бұл орайда Жамбыл өңірінде қауіптің алдын алу мақсатында тиісті шаралар ұйымдастырылуда. Қаражат бөлініп, жұмыс күші де жолға қойылған.
