Бүгінде коронавирус індетін жұқтыру бойынша өңірде Тараз қаласы алға шығып отыр. Мәліметке сәйкес, облыс орталығында қазіргі кезеңде
4 578 адам қауіпті індетті жұқтырған. Сондай-ақ Байзақ ауданында 707, Жамбылда 421, Жуалыда 301, Қордайда 1 158, Т.Рысқұлов ауданында 236, Меркіде 223, Мойынқұмда 168, Сарысуда 219, Талас ауданында 174 және Шу ауданында 569 жағдай анықталған. Сонымен қатар, әскерге шақырылушылар арасынан 125 жағдай мен басқа облыс тұрғындары арасынан 57 жағдай тіркелген. Облыс орталығы мен аймақтың бірқатар ауданында да пневмонияның жағдайы анықталған.
Қауіпті індеттің алдын алу және тұрғындарды қорғау мақсатында өңірде бірқатар жұмыс ұйымдастырылуда. «Биылғы 25 мамыр күнгі ақпарат бойынша, 2 580 орындық инфекциялық стационарларда 917, оның ішінде 250 төсектік орында 76 науқас ем қабылдауда. Карантиндік стационарларға 13 тұлға орналастырылған. Өңірдегі 10 зертханада жалпы тәулігіне шамамен
2 600-2 800 ПТР зерттеу жүргізілуде», дейді облыстық денсаулық сақтау басқармасының басшысы Әсет Қалиев. Сонымен қатар жалпы облыс бойынша 22 денсаулық сақтау ұйымдарында 42 егу пункті бар. Олардың ішінде 14 пункт Тараз қаласында және 28 пункт аудандарда орналасқан.
Биыл 1 ақпаннан бастап облысқа 1 мың адамға арналған 2 мың доза QazCovid-in вакцинасы, 92 700 доза Спутник V вакцинасының 1 компоненті және 71 600 доза 2 компоненті мен 27 мың доза Hayat Vax вакцинасы келді. Аталған басқарманың мәліметінше, жалпы өсіммен 102 423 тұлға Спутник V вакцинасының 1-компонентімен, оның ішінде 1 459 тұлға отандық вакцинамен, 92 041 тұлға Спутник V және 9 380 тұлға Hayat Vax вакцинасымен екпе алған. Оның ішінде 13 379 адам медицина қызметкерлері, 18 295 адам облыстағы білім беру мекемелерінің қызметкерлері, 15 842 адам арнайы күштік құрылым қызметкерлері, 2 115 адам мемлекеттік қызметшілер және 52 792 басқа да тұлғалар бар. «Вакцинаның 2-компоненті өсіммен 36 264 тұлғаға екпе жүргізілді. Егуден кейінгі асқынулар тіркелген жоқ. Бүгінге отандық вакцинаның 582, Hayat Vax вакцинасының 17 618 дозасы, Спутник V 1-компоненттің 659, 2-компоненттің 35 911 дозасы қалды», дейді Ә.Қалиев.
Жамбыл облысы
