Қымбатшылық пен қуаңшылық мәселесі қалай шешіліп жатыр?

2021 жылдың 5 айында өңір­лердің даму қорытындысына сәй­кес Маңғыстау облысы өте жақ­сы көрсеткіш көрсетіп отыр. Ал­дымен осыдан бастаған Серікбай Трұ­мовтың айтуынша, өңір өңдеу өнеркәсібі, инвестиция, ауыл шаруашылығы, құрылыс жұмыс­тары және тұрғын үйді іске қосу сауда, көлік қатынасы, яғни эко­но­миканың барлық 7 бағыты бо­йынша оң өсімге қол жеткізді.

– Биыл 5 айда өңдеу өнер­кә­сібін дамыту саласындағы өндіріс көлемі 4,5% өсіп, 63,5 млрд теңгені құрады. Мысалы, минералды тыңайтқыштар, битум, мұнай өнімдерін өндіру біршама өсті. Ақтаудағы Каспий битум зауыты аталған мерзімде жалпы елімізде өндірілген жол битумының 48%-ын қамтып отыр. Биыл бұл салада жалпы құны 21 млрд 700 мың теңге болатын 8 жаңа жоба іске асырылуда. Нәтижесінде, 200-ден аса жаңа жұмыс орны құрылады деп күтілуде. Сонымен қатар Маңғыстау облысы – инвестиция көздерін тарту бойынша үздік аймақтар қатарында. Жүйелі жұмыстың нәтижесінде облысқа тартылған инвестиция көлемі 5 айда 12,9%-ға артып, 216,1 млрд теңгені құрады. Биыл облыста 270 млрд теңгеге жуық қаржыға 12 инвестициялық жобаны іске асыру жоспарланып отыр. Осы арқылы 2 600 адамды жұмыспен қамту көзделген. Өңірге инвестиция тартуда арнайы экономикалық аймағының үлесі зор. Арнайы экономикалық аймағы ашылғалы 200 млрд теңгеден аса инвестиция тартылды. Бүгінде бұл аймақта 19 өндіріс ошағы жұмыс істеп тұр. Онда 1 800-ге тарта адам еңбек етуде. Алдағы уақыт­та шетелдік және отандық инвес­тор­лардың қатысуымен тағы 5 жоба жүзеге асырылмақ. Мем­лекет басшысының арнайы эко­номикалық аймағының тиімділігі мен толымдылығын қамтамасыз ету бойынша тапсырмасына сәй­кес сапалы жобаларды жүзеге асыру жұмыстары жалғасуда, – деді С.Трұмов.

Оның айтуынша, Маңғыстау – Қазақстандағы туризмді дамытуға қолайлы аймақтардың үздік онды­ғына кіреді. Ақтау қаласында жаға­жай туризмін, ал аудандарда эко, этнотуризмді дамытуға мүм­кіндік зор. Бұл мақсатта ке­шенді жос­пар жасақталып, сала­ны жетіл­діру бағыттары айқын­далды. Былтыр өңірге 160 мыңнан аса турист келген. Биыл Маңғыстауға 200 мыңға жуық адам келеді деп күтілуде. Былтыр теңіз жағалауында «Риксос» туристік кешені іске қосылған. Күні бүгінге дейін бұл қонақүйге 124 мыңнан аса адам демалуға келген. Ал биыл жыл басынан бері 46 мыңнан аса адамды қа­был­дады. Бұл қонақүйге 600-ден аса тұрғын жұмысқа орналас­ты, бірнеше жергілікті тауар өндірушілер және қызмет көрсе­ту­шілермен келісімшарттар жасал­ды. Бұл келісім облыстағы шағын және орта кәсіптің жандануына септігін тигізіп отыр.

Қазіргі уақытта Мемлекет басшысы Қасым-Жомарт Тоқаевтың тапсырмасына сәйкес Үкіметтің қолдауымен қаржы бөлініп, Ақтау қаласының іргесіндегі жылы жағажайды инфрақұрылыммен қамту жобаларын іске асырудың екінші кезеңі жалғасуда. Курорт­тық аймақты дамытудың 2-ке­зеңі аясында ірі компаниялар жаңа қонақүйлер, гольф-клуб, отба­сылық ойын-сауық саяба­ғын­ың құрылысын жүргізуде. Бұл жо­баларға 180 млрд теңгеден аса ин­вестиция тарту арқылы 1600-ге жуық жаңа жұмыс орнын ашу көзделіп отыр. Бүгінде ішкі туризм­­­­ге елдің қызығушылығын жә­не мемлекеттің қолдауын сезін­ген жергілікті кәсіпкерлер де «Жы­лы жағажай» аумағында ин­вес­­ти­циялық жобаларын іске асыруда.

– Өңір экономикасын әртарап­тандырудың тағы бір маңыз­ды бағыты – ауыл шаруа­шылығын дамыту. Биыл 5 айда ауыл шаруа­шылығының 5,1 млрд теңгенің өнімі өндіріліп, 3% өсім қам­тамасыз етілді. Осы жылы ауыл шаруашылығы саласында жалпы 8 млрд теңге болатын 10 жоба­ны жүзеге асыру арқы­лы 200-ге жуық жұмыс орнын құру жос­парланып отыр. Биылға жоспар­ланған инвестициялық жо­ба­лардың ішінде жақында құс фаб­рикасы ашылды. Бұл фаб­рикада жылына 5 мың тонна тауық еті өндіріледі. Аталған кәсіпорын болашақта тауық етіне деген ішкі сұраныстың 50%-ын қамтамасыз ете­ді деп күтілуде. Сонымен қатар Мұнайлы ауданы 15 мың тон­на құрама жем өндіретін зауытты іске қосты. Жыл сайын жылы­жайлар алаңын 7 гектарға ұлғайта отырып, бақша және көкөніс өнімдерін 10%-ға дейін көбейтуді жоспарлап отырмыз. Осы мақсатта қазіргі таңда Aktau Green House компаниясы мен жергілікті кәсіпкерлерге жылыжай алаңдарын көбейту үшін арнайы жер телімдері беріліп, арнайы жұмыстар басталып кетті. Аталған жылыжай іске қосылған жағдайда кемінде 22 мың тонна өнім алуға болады. Бұл ішкі нарықты 35-40%-ға дейін өніммен қамтамасыз етуге мүмкіндік береді, – деді облыс әкімі.

Сонымен қатар әкім өңірде азық-түлік қауіпсіздігін қамта­масыз ету мақсатында жыл сайын әлеу­меттік маңызы бар тауарлар­ды тұрақтандыру қоры қалып­тасып жатқанын атап өтті. Қазіргі уа­қытта әлеуметтік маңызы бар азық-түлік өнімдерінің 11 түрі бо­йынша 2 мың тонна қор жасақ­­­талды. Аталған азық-түлік ба­­­ғаларын төмендету және ұстап тұру мақсатында облыста бар­лық сауда желілерімен мемо­рандумдарға қол қойылды. Сауда орындарында қолжетімді бағамен сатылатын «Әлеуметтік бұрыш» жобасы іске қосылды.

С.Трұмовқа журналистер тарапынан қойылған сұрақтардың ішінде қуаңшылық мәселесі жиі қозғалды. Өз кезегінде өңір басшысы бұл жағдайды барынша реттеу амалдары жасалып жатқанын айтты.

– Биыл қыста қардың, көктем­де жауын-шашынның түспеуі мал өсіріп отырған шаруаларға қиын­дық тудырып отыр. Осыған орай ар­найы жұмыс тобы құрылды. Өлке­нің жеке шаруашылықтарын мал азы­ғымен қамтамасыз ету үшін жақын орналасқан Ақтөбе об­лысымен келіссөздер жүргізіл­ді. Оның ішінде мал азығын қа­жетті мөлшерде жеткі­зуге және Маңғыстау облысы­ның шаруа­шы­лықтарына жайы­лымдыққа, шабындыққа жер учас­келерін беруге келісілді. Бүгінгі таңда бұл жұмыстарды бастап кет­тік. Жергілікті бюджеттен мал азығы қорын қалыптастыру мақса­тында 200 млн теңгеден астам қаражат бөлінді. Көрші облыстардан тиелген жем-шөп өңір шаруаларына жеткізілуде. Соны­мен қатар орын алған жағдай­ға байланысты құрамында Ауыл ша­руашылығы, Эко­логия министрлігі өкілдері, Мәжіліс депутаттары, респуб­ликалық «Қазгидромет» басшы­сы, жергілікті атқарушы орган­дар­дың қызметкерлерінен тұ­ра­­тын арнайы жұмыс тобы құ­ры­­лып облыстың қазіргі жағ­дайымен танысты, жергілікті халықпен кездесті. Нәтижесінде, мемлекеттік қол­дау­ларға өзгеріс­тер енгізу, Үкімет тарапынан қол­дау көрсету қажеттігі бойынша ұсыныс беріліп жұмыс жал­ға­суда. Осы жұмыстар аясында «Азық түлік келісім-шарт корпорациясы» АҚ арқылы 1 700 тонна арзан бағада арпа алдыру жос­парланып отыр. «Қазгидромет» РМК мәліметінше, Маңғыстауда жауын-шашынның мөлшері қа­жет­ті норманың 17% құрап отыр, – деді С.Трұмов.

Оның айтуынша, Азық-түлік корпорациясынан жем-шөп алу бойынша тиісті қаражат бөлінді, 15-20 маусымға дейін 10 вагон жем жеткізіліп, шаруашылықтарға жеңілдетілген бағамен ұсы­ны­лады. Ресми мәліметтерге сәй­кес, көктемде 1 мыңнан аса мал басы өлген. Бұл жағдайлар бо­йынша сараптамалық комиссия жұмыс істеуде, тиісті шешімдер қабылданады.